Қазақстан сирек метал қоры бойынша үштікке енуі мүмкін

«Жаңа Қазақстан» кенішінен 14 мың тонна сирек метал алуға болады. Мұнда барланған кеннің жалпы көлемі 20 млн тонна. Кеніш Астанадан 500 шақырым жерде орналасқан. Қазір мамандар барлау жұмысын жүргізіп жатыр. 

Болжам нақтыланса, Қазақстан жерде кездесетін сирек метал қоры бойынша үштікке енуі мүмкін. Жаһандық нарықтағы көшбасшылар сапында қазір Қытай мен АҚШ тұр. Халықаралық энергетика агенттігінің есебіне сүйенсек, алдағы бес жылда жерде сирек кездесетін металдарға сұраныс екі есе артып, 315 мың тоннаға жетеді. 

Ал қазақ жерінде Менделеев кестесінде осындай 17 элемент бар. Оның ішінде 2,5 млн тоннаға жуық вольфрам, 1 млн тоннадан асатын молибден, 841 мың тонна никель, 226 мың тонна литий т.б. бар. Өнеркәсіп және құрылыс министрлігі қор бойынша дерек әлі де жаңаратынын хабарлайды.