Қазақстан треонин мен глутамат бойынша әлемдік нарықтарға шығады

— Ауыл шаруашылығы өнімдерін терең өңдеу саласын дамыту — маңызды бағыттардың бірі. Мәселен, биыл Жамбыл облысында жүгеріні терең өңдеуге арналған ірі өнеркәсіптік парк іске қосылады. Бұл Қазақстанға треонин мен глутамат бойынша әлемдік нарықтарға шығуға мүмкіндік береді. Оның үстіне жаңа зауыт жыл сайын 3 млн тонна көлемінде жүгеріге кепілдік берілген сұранысты қалыптастырады. Ал, қазір бүкіл Қазақстан бойынша небәрі 1 млн тонна жүгері өсіріледі, яғни, бір ғана зауыт нарық құрылымын өзгертіп, агроөндірістің жекелеген бағыттарының дамуына қуатты серпін береді, — деді Олжас Бектенов.

Үкімет басшысының дерегінше, 2025 жылы майлы дақылдарды, жүнді, ет пен сүтті терең өңдеуге, сондай-ақ құрама жем мен шырын өндіруге арналған 6 кәсіпорын іске қосылды. Сонымен қатар агроөнеркәсіп кешенінде он зауыт салынып жатыр. Алайда саланың әлеуеті бұдан әлдеқайда жоғары.

— Бұл орайда Үкімет терең өңдеу жобаларына арнайы мемлекеттік қолдау көрсетіп келеді. Мысалы, астықты өңдеуге инвестициялық субсидиялар 50 пайызға ұлғайтылды. Сондай-ақ жабдықты импорттау мен негізгі қызмет түрлері бойынша салықтардан босату көзделген, — деді Премьер-министр.

Бұған дейін Премьер-министр өңдеу өнеркәсібінің қазіргі өсу қарқыны экономиканы толыққанды әртараптандыру үшін жеткіліксіз екенін айтқан еді.