Қазақстанда аэротаксимен ұшу бағасы айтылды

Премьер-министрдің орынбасары Қанат Бозымбаев үкіметте өткен брифингте Қазақстанда аэротаксимен ұшудың бір шақырымы қанша тұратынын айтты, - деп хабарлайды Tengrinews.kz.

Премьер-министрдің орынбасары Қанат Бозымбаев үкіметте өткен брифингте Қазақстанда аэротаксимен ұшудың бір шақырымы қанша тұратынын айтты, - деп хабарлайды Tengrinews.kz.

Бозымбаевтың айтуынша, аэротаксимен ұшудың болжамды құны бір шақырымға шамамен бір доллар болады.

"Мәселен, жолаушы Алматы әуежайына ұшып келді делік. Қазір кептеліске байланысты жол бір жарым-екі сағат уақыт алады. Маңайда дрондарды орналастыру жоспарланған: адам ұшуды алдын ала брондайды. Қазір бұл шамамен шықырымына бір доллар, мысалмен айтқанда, 15 шақырым үшін адам 15 доллар төлеп, діттеген жеріне жетеді", – деді Бозымбаев.

Демек, жоспар бойынша әуежайдан Алматы орталығына дейін ұшу құны 7-8 мың теңге көлемінде болмақ. Үкіметтегілер кейінірек "бәсекелестік есебінен" ұшу бағасы арзандайды деп үміттенеді.

"Бизнес үшін бұл бәсекелестік тудырады, уақыт өте келе одан да арзандай түседі. Сондай-ақ жеткізу қызметі де дамиды. Біз жалпы Алатаудағы ғимараттардың барлық жобалық шешімдері жеткізуді ұйымдастыру үшін жолаушыларға да, жүк дрондарына да бейімделген болуын жоспарлап отырмыз", – деп түсіндірді Бозымбаев.

Естеріңізге сала кетейік: ұшатын такси мен квадропорттар Қазақстанда Алатау қаласының құрылысы аясында пайда болады. Аэротаксиді Алатау, Алматы және туристік орындар арасында іске қосуға уәде беріп отыр. Жобаны алдағы 2-3 жылда сынақтан өткізу жоспарланған.

Бұған дейін ұшқышсыз аэротаксилер сағатына 300 километрден аса жылдамдықпен Алматы әуежайынан Медеуге дейін жолаушыларды 10 минутта жеткізе алатыны туралы жазған болатынбыз. Алатауда аэротакси алғаш рет сынақтан өткізілді.

Google News арқылы жаңалықтарымызды қадағалаңыз