Қазақстанда ағаш кесу зардабын есептеудің жаңа тәртібін енгізу ұсынылды

Қазақстанда ағаштар мен бұталарды заңсыз кескені және зақымдағаны үшін зиянды есептеу тәсілін қайта қарау ұсынылды. Мұндай депутаттық сауалды Құрылтай депутаты Ажар Сағындықова экология және табиғи ресурстар министрі Әлібек Қуантыровқа жолдады, - деп хабарлайды Tengrinews.kz тілшісі.

Нені өзгерту ұсынылып отыр?

Депутаттың сөзінше, 2025 жылы Қазақстанда ағаштар мен бұталарды заңсыз кесу, дайындау, зақымдау немесе жою үшін зиянды өтеудің жеке мөлшерлемелері енгізілді. Өсімдіктің түрі мен жасына байланысты олар 9-дан 80 АЕК-ке дейін (2026 жылы 38 925 - 346 000 теңге) болады.

Сағындықова бұл сомалар есептелетін принципті барынша түсінікті ету қажет деп санайды.

"Азамат немесе заңды тұлға нақты бір ағаш үшін неге мұндай жауапкершілік мөлшері белгіленгенін түсінуі тиіс. Бұл нормативтік актідегі жай ғана цифр емес, түсінікті ғылыми, экологиялық және экономикалық есептеулердің нәтижесі болуы керек", - деді ол.

Депутат зиянды бағалау кезінде тек зақымдалған немесе жойылған өсімдіктердің санын ғана есепке алмауды ұсынды. Ағаш түрінің табиғат қорғау мәртебесі, зақымдану дәрежесі, қалпына келтіру мүмкіндігі, қалпына келтіруге жұмсалатын нақты шығындар және аумақтың экологиялық маңызы ескерілуі тиіс.

Сағындықованың айтуынша, жойылып кету қаупі төнген сирек кездесетін түрді жою мен қалпына келтіруге болатын қарапайым ағашты зақымдау бірдей формальды принциппен бағаланбауы керек. Сол сияқты, жекелеген заңбұзушылық пен тұтас популяцияға немесе өсімдіктер қауымдастығына келтірілген зарардың аражігін ажырату қажет.

Тағы бір ұсыныс мемлекеттің табиғатқа келтірілген залал үшін өндіріп алатын қаражатына қатысты. Депутат бұл ақшаның нақты неге жұмсалатынын және оған не қалпына келтірілгенін жұртшылық көруі тиіс деп санайды.

Ажар Сағындықова бұл жерде өсімдіктер дүниесін жойғаны үшін жауапкершілікті жеңілдету туралы сөз болып отырмағанын қадап айтты.

"Табиғатты заңсыз жойғаны үшін жауапкершілік бұлжытпай орындалуы тиіс. Бірақ ол негізді, ашық және нақты экологиялық залалға сәйкес болуы керек", - деді ол.

Депутат өсімдіктер дүниесіне келтірілген зиянды бағалаудың заманауи әрі ашық әдістемесіне көшуді ұсынды, ол тек зақымдалған нысандардың санын ғана емес, сонымен бірге қоршаған ортаға тигізетін зардаптарын да ескеретін болады.

Бұған дейін Алматы тұрғындары Егізбаев көшесіндегі жаңа тұрғын үй кешенінің жанында ағаштардың кесілгенін байқаған болатын. Қалалық әкімдік бұл жағдайға қатысты пікір беріп, мердігерлердің жасыл желектерді заңды негізде кескенін мәлімдеді. Толығырақ - материалдан оқыңыз.

Тағы оқыңыз: Алматыда 2027 жылдан бастап ағаштар жаңа ереже бойынша кесіледі

Бізді Google-дың негізгі дереккөздер тізіміне қосыңыз