Қазақстанда алғашқы АЭС салынбақ: станция бір ғасыр жұмыс істейді

Энергетика министрі Алмасадам Сәтқалиевтің айтуынша, Қазақстанда салынатын алғашқы атом электр станциясы жылына шамамен 19,5 млрд киловатт-сағат электр энергиясын өндіреді, деп хабарлайды forbes.kz.

Бұл көлем елдің қазіргі тұтынуының 20 пайызына жуық қажеттілігін жабуға мүмкіндік береді.

Өндірілген электр энергиясы ең алдымен ішкі нарыққа бағытталады. Сонымен қатар Қазақстан аймақтық бірыңғай энергожүйе аясында мемлекетаралық электр алмасуға қатысуы мүмкін.

Министр жобаның басты шарттары ретінде қаржылық үлгі мен инвестицияның қайтарымдылығын атады. Оның айтуынша, заманауи технологиялар станцияны ұзақ мерзім пайдалануға жол ашады: 

«Қазіргі технологиялар станцияны 60 жыл пайдалануға мүмкіндік береді, әрі екі рет 20 жылға ұзартуға болады. Яғни, біз жүз жылдық мерзім туралы айтып отырмыз», – деді Сәтқалиев.

Энергетика министрлігі әзірге тұтынушылар үшін нақты тариф пен инвестицияның қайтару мерзімін жариялаған жоқ. Бұл көрсеткіштер жобаның толық жобалау кезеңі аяқталғаннан кейін және қаржылық модель нақтыланған соң белгілі болады.

Бүгін, 13:12