Қазақстанда Farfetch ресурсының қолжетімділігі шектелді: себебі аталды

Қазақстанда киім, аяқ киім және аксессуарлар, соның ішінде танымал брендтер сатылатын Farfetch халықаралық онлайн-платформасына кіру шектелді. Бұған салық заңнамасы талаптарының орындалмауы себеп болды, деп хабарлайды Tengrinews.kz Мемлекеттік кірістер комитетіне (МКК) сілтеме жасап.

Комитет Қазақстанда шетелдік интернет-платформалардың ресурстары салық заңнамасының талаптарын орындамаған жағдайда, оларға кіруге шектеу қойылуы мүмкін екенін еске салды. Бұған дейін қазақстандық салық мамандары Ұлыбританияда тіркелген Farfetch платформасының операторына камералдық бақылау хабарламасын жіберген, алайда оған ешқандай жауап болмаған.

"Комитет мұндай шаралар тиісті талаптар қолданылатын және Қазақстан бюджеті алдындағы салықтық міндеттемелерін орындамайтын барлық шетелдік интернет-платформаларға заңнамада белгіленген тәртіппен қолданылатынын атап өтеді", - делінген хабарламада.

Бұл ретте Pinduoduo платформасы салықтық әкімшілендіру нәтижесінде бюджетке 6,8 миллиард теңге (15,1 миллион АҚШ доллары) аударған.

Ал Claude жасанды интеллект көмекшісін әзірлеуші Anthropic, PBC компаниясы өткен салық кезеңдері үшін 1,2 миллиард теңге (шамамен 2,6 миллион доллар) төледі.

"Компания камералдық бақылау нәтижелері бойынша жолданған хабарламаларды орындады", - деп толықтырды комитет.

Бұған дейін МКК қазақстандықтардың шетелдік компанияларға, соның ішінде маркетплейстерге жасаған аударымдарын бақылайтыны туралы жазған едік. Мұндай төлемдер туралы ақпаратты ведомствоға банктер береді. Салық қызметіне бұл деректер не үшін қажет және олар қалай пайдаланылады - мына материалдан оқыңыз.

Тағы оқыңыз:Қазақстанда шетелдік маркетплейстерге бақылау күшейтілмек

Бізді Google-дың негізгі дереккөздер тізіміне қосыңыз