Қазақстанда медицина қызметкерлерінің атын жамылған алаяқтық деректері көбейген

Әлеуметтік желілерде емханаларға барғаннан кейін азаматтарға түсетін күмәнді қоңыраулар туралы ақпараттың таралуына байланысты ведомство белгісіз тұлғаларға SMS-кодтарды және жеке деректерді бермеуді, сондай-ақ күмәнді сілтемелерге өтпеуді ескертеді.

Министрліктің мәліметінше, мұндай жағдайлар еліміздің әртүрлі өңірлерінде тіркеліп отыр және көбіне медициналық ұйымдардың қызметіне қатысы жоқ. Алаяқтар азаматтардың, соның ішінде егде жастағы адамдардың сеніміне кіріп, өздерін емхана немесе өзге мекеме қызметкерлері ретінде таныстырады.

Осыған байланысты Денсаулық сақтау министрлігі келесі сақтық шараларын ұстануға шақырады:

– SMS-кодтарды және жеке деректерді үшінші тұлғаларға бермеу;
– телефон арқылы алынған ақпараттың шынайылығын міндетті түрде тексеру;
– күмәнді қоңыраулар болған жағдайда өз медициналық ұйымына немесе құқық қорғау органдарына жүгіну.

Сондай-ақ азаматтарға өздерінің тіркелу мәртебесін eGov.kz/eGov Mobile порталы немесе Damumed қосымшасы арқылы дербес тексеру ұсынылады.

Ведомствоның мәлімдеуінше, медициналық ұйымдарға қабылдауға жазылу eGov.kz немесе eGov Mobile порталы, медициналық ақпараттық жүйелердің мобильді қосымшалары, сондай-ақ тіркеу бөліміне телефон арқылы жүзеге асырылады.

«SMS-кодтар пациенттерге тек цифрлық сервистерде авторизациядан өту барысында ғана жіберіледі. Медициналық ұйым қызметкерлері телефон арқылы SMS-кодтарды сұрамайды», – деп атап өтті министрлік.

Қазіргі уақытта пациенттердің қабылдауға барғанын нақты уақыт режимінде бақылауға мүмкіндік беретін жүйелердің бұзылуы немесе рұқсатсыз қол жеткізу фактілері тіркелмеген.

Министрлік дерегінше, азаматтардың жеке деректерінің ықтимал таралуына қатысты ресми өтініштер түскен жағдайда уәкілетті мемлекеттік органдардың қатысуымен тиісті тексерулер жүргізіледі.

Ведомство мұндай жағдайлар азаматтарды жаңылыстыру арқылы олардың жеке деректері мен қаржылық сервистеріне қол жеткізуге бағытталған кең таралған алаяқтық схемалардың белгілеріне сәйкес келетінін атап өтті.

Денсаулық сақтау министрлігі цифрлық сервистердің қауіпсіздігін қамтамасыз ету және азаматтардың жеке деректерін қорғау бойынша жұмысты жалғастырып жатқанын мәлімдеді.

Айта кетейік, ІІМ Қазақстанда алаяқтықтың жаңа тәсілі таралып жатқанын ескертті.