Halyk Bank пен Beeline: танымал компаниялар атын жамылған алаяқтар халықты тонаған

Қаржылық мониторинг агенттігі (ҚМА) Бас прокуратура және «TELE2» мамандарымен бірлесіп, елімізде фишингтік шабуылдармен айналысқан қауіпті топтың жолын кесті. Қаскөйлер бұған дейін ТМД аумағында кездеспеген ерекше технологияны қолданған.

«SMS-бластер» қалай жұмыс істеген?

Қылмыскерлер ұялы байланыс операторларының базалық станциясына ұқсас жұмыс істейтін «SMS-бластер» атты арнайы құрылғыны пайдаланған. Бұл аппарат 300 метр радиустағы телефондарды өз желісіне автоматты түрде қосып, операторлардың қорғанысын айналып өтеді.

Жылдамдық: Сағатына 100 мың хабарлама таратуға қауқарлы.

Әдісі: Құрылғыны көлікке орнатып, адам көп жиналатын сауда орталықтары мен базарларды аралап жүрген.

Тәсілі: Пайдаланушыларға «Beeline» немесе «Halyk Bank» атынан «бонустарды айырбастау» туралы жалған хабарламалар жіберілген.

Бонус орнына — бос әмиян

Жалған сілтемеге өткен азаматтар фишингтік сайттарға тап болып, өз еркімен жеке деректерін, банк картасының нөмірін, CVV-кодын және SMS-растау кодтарын енгізген. Осылайша, қаскөйлер жәбірленушілердің шотындағы ақшаны емін-еркін жымқырып отырған.

«Қылмыстық топ схеманы енді ғана іске асыра бастаған кезеңде қолға түсті. Бұл мыңдаған азаматтың қаржылық шығынға ұшырауының алдын алуға мүмкіндік берді», — деп хабарлайды ҚМА баспасөз қызметі.

Тергеу барысы және сақтық шаралары

Қазіргі таңда төрт күдікті ұсталып, қамауға алынды. Тергеу амалдары жалғасып жатыр.

Агенттік азаматтарға мынадай қауіпсіздік ережелерін сақтауды ескертеді:

Күмәнді сілтемелерге ешқашан өтпеңіз.

Тексерілмеген сайттарға банк картасының деректерін енгізбеңіз.

Есіңізде болсын: банк немесе байланыс операторлары SMS арқылы құпия кодтарды немесе жеке деректерді ешқашан сұрамайды.

Кез келген күмәнді жағдайда ҚМА-ның 1458 Call-орталығына хабарласуға болады.

Бүгін, 10:48