Қазақстанда тағы үш жол учаскесі ақылы болады абонемент кімге беріледі

10 шілдеден бастап Қазақстанда республикалық маңызы бар автожолдардың үш жаңа учаскесінде ақылы жүйе енгізіледі, - деп хабарлайды Tengri Auto.

"ҚазАвтоЖол" мәліметінше, 10 шілдеден бастап Қарағанды – Балқаш – Бурылбайтал, Бурылбайтал – Күрті және Талдықорған – Өскемен учаскелерінде ақылы режим қолданысқа енеді.

Қарағанды – Балқаш – Бурылбайтал

Қарағанды – Балқаш – Бурылбайтал автожолының жалпы ұзындығы 645,64 шақырым болатын учаскесі ақылы болады. Оның ішінде 91 шақырымы қазірдің өзінде ақылы, ал қалған 554,64 шақырымы үшін төлем алғаш рет енгізіліп отыр.

Учаске тасжолдың 247-шақырымы 700-метрінен басталып, 2151-шақырымында аяқталады.

Рұқсат етілген ең жоғары жылдамдық сағатына 140 шақырым болады.

Анықтама: Көлік құралдары Бұқар Жырау, Абай, Шет, Ақтоғай, Мойынқұм, Жамбыл аудандарында, сондай-ақ Балқаш және Приозерск қалаларында тіркелген пайдаланушылар абонементтік төлемді рәсімдей алады.

Бурылбайтал – Күрті

Тағы бір жаңа ақылы учаске Бурылбайтал – Күрті тасжолында пайда болады. Оның ұзындығы автожолдың 1041-шақырымынан 1121-шақырымына дейінгі 80 шақырымды құрайды.

Бұл учаскеде де рұқсат етілген ең жоғары жылдамдық - сағатына 140 шақырым.

Анықтама: Көлік құралдары Жамбыл және Іле аудандарында тіркелген пайдаланушылар абонементтік төлемді рәсімдей алады.

Талдықорған – Өскемен

2026 жылдың 11 шілдесінен бастап Талдықорған – Өскемен автожолының учаскесі ақылы болады.

Ақылы учаскенің жалпы ұзындығы 772,955 шақырым болады. Оның 32,4 шақырымы бірінші санаттағы жолға, ал 740,55 шақырымы екінші санатқа жатады.

Учаске тасжолдың 287-шақырымынан басталып, 1073-шақырымында аяқталады.

Рұқсат етілген ең жоғары жылдамдық жолдың санатына байланысты:

бірінші санаттағы учаскеде сағатына 110 шақырымға дейін, екінші санаттағы учаскеде - сағатына 100 шақырымға дейін жүруге болады.

Анықтама: Көлік құралдары Ескелді, Ақсу, Сарқан, Алакөл, Үржар, Аягөз, Жарма және Ұлан аудандарында тіркелген пайдаланушылар абонементтік төлемді рәсімдей алады.

"Барлық учаскеде қажетті инфрақұрылым дайындалды. Көлік құралдарын сәйкестендіру және жолақыны есептеу бақылау аркалары арқылы өткен кезде мемлекеттік тіркеу нөмірін тіркеу арқылы автоматты түрде жүзеге асырылады", - деп хабарлады компания.

Абонементті қалай ресімдеуге болады

1403 байланыс орталығы арқылы:

автокөлік шотын абонемент сомасына толтырып, қызметті қосу үшін байланыс орталығына хабарласыңыз.

kaztoll.kz сайты арқылы:

kaztoll.kz сайтына тіркеліңіз; көлік құралыңызды қосыңыз; "Абонементті ресімдеу" бөлімін және абонементтің қажетті түрін (айлық немесе жылдық) таңдаңыз.

Ақы алу пункттерінде немесе клиенттерге қызмет көрсету орталықтарында:

ақы алу пунктіндегі немесе қызмет көрсету орталығындағы операторға жүгініңіз; абонемент ақысын ыңғайлы тәсілмен (карта, қолма-қол ақша немесе интернет-банкинг) төлеңіз.

Google News арқылы жаңалықтарымызды қадағалаңыз

Жазылу