Талдықорған Өскемен тас жолының учаскесі ақылы болады

11 шілдеден бастап Қазақстандағы республикалық маңызы бар тағы бір тасжол учаскесі ақылы болады, - деп хабарлайды Tengri Auto.

11 шілдеден бастап Қазақстандағы республикалық маңызы бар тағы бір тасжол учаскесі ақылы болады, - деп хабарлайды Tengri Auto.

Әңгіме Алматы – Талдықорған – Өскемен – Шемонаиха – Ресей шекарасы ("Убе" өткізу пункті) автожолының Талдықорған – Өскемен учаскесі туралы болып отыр. Оның ұзындығы 772,955 шақырым болады.

Бұйрыққа сәйкес, ақылы режим 20 жылға енгізіледі.

Бұл ретте жүргізушілер үшін тегін баламалы бағыт сақталады. Ақылы учаскені облыстық маңызы бар Талдықорған – Үштөбе – Молалы – Лепсі – Ақтоғай – Таңсық – Аягөз – Қарауыл – Семей жолымен, сондай-ақ Семей – Өскемен республикалық тасжолы арқылы айналып өтуге болады.

Учаске І-б және ІІ санатты жолдарға жатады. Оның кесіндісіне байланысты әр бағытта бір немесе екі қозғалыс жолағы қарастырылған, ал әр жолақтың ені кемінде 3,75 метр болады.

Көлік құралының санатына байланысты бүкіл бағыт бойынша бір жаққа жүру құны 117-ден 25 292 теңге аралығында болады. Алдын ала төлем жасаған жағдайда тариф жол жүріп өткеннен кейінгі төлемге қарағанда төмен болады.

Бір реттік төлемнен бөлек, жүргізушілерге айлық және жылдық абонементтер қолжетімді болады. Сондай-ақ бұйрықта баламалы жол жоқ елді мекендердің тізімі көрсетілген.

Абонементті қалай ресімдеуге болады?

1403 байланыс орталығы арқылы:

автокөлік шотын абонемент сомасына толтырып, қызметті қосу үшін байланыс орталығына хабарласыңыз.

kaztoll.kz сайты арқылы:

kaztoll.kz сайтына тіркеліңіз; көлік құралыңызды қосыңыз; "Абонементті ресімдеу" бөлімін және абонементтің қажетті түрін (айлық немесе жылдық) таңдаңыз.

Ақы алу пункттерінде немесе клиенттерге қызмет көрсету орталықтарында:

ақы алу пунктіндегі немесе қызмет көрсету орталығындағы операторға жүгініңіз; абонемент ақысын ыңғайлы тәсілмен (карта, қолма-қол ақша немесе интернет-банкинг) төлеңіз.

Бұған дейін Астана - Алматы тасжолының учаскесі ақылы болатыны хабарланған болатын.

Google News арқылы жаңалықтарымызды қадағалаңыз

Жазылу