“Талдықорған Қалбатау Өскемен” тас жолындағы жаңғырту жұмыстары аяқталуға жақын

Республикалық маңызы бар “Талдықорған – Қалбатау – Өскемен” автожолының құрылысы мәресіне таяп қалды. Қазір жолдың негізгі бөлігіне асфальт төселіп бітіп, соңғы абаттандыру жұмыстары жүргізілуде. Трасса көлік қозғалысы үшін ашық, ал бұл өз кезегінде Қытай мен Ресейге бағытталған транзитті күшейтіп, өңір экономикасына серпін беруде, деп хабарлайды Arasha.kz.

Абай облысы аумағынан өтетін жол бөлігі 352 шақырымды қамтиды. Құрылыс сегіз учаскеде қатар жүргізіліп, нәтижесінде 22 көпір мен шамамен 300 су өткізгіш құбыр салынды. Сонымен қатар демалыс аймақтары мен елді мекендерге кіреберіс жолдар ретке келтіріліп, жарықтандыру жүйесі орнатылған.

«ҚазАвтоЖол» ҰК АҚ Абай облыстық филиалының бас маманы Серік Жұмабековтың айтуынша, барлық жол белгілері жоба талабына сай қойылған. Сондай-ақ облыс аумағында тоғыз нүктеге бақылау камералары орнатылуда.

Жоба құны — 185,8 миллиард теңге. Құрылыстың 15 пайызы республикалық бюджеттен, қалған бөлігі Қытай қаржыландыруы есебінен жүзеге асырылған.

Жобаның атқарушы директоры Хан Лиси:
«Жол құрылысына арналған материалдар Германиядан жеткізілді. Климаттық ерекшеліктерді ескере отырып, Абай облысы аумағында арнайы полимер қоспалары қолданылды. Қазір жұмыс көлемінің шамамен 2 пайызы ғана қалды. Барлығын жуық арада аяқтап, екі жылдық кепілдік береміз», – деді.

Жол бойындағы қауіпсіздік инфрақұрылымы да толық жаңартылған: жаңа жол белгілері, тосқауыл мен қар тоқтатқыш қоршаулар орнатылды. Кейбір ауылдарға кіреберіс және ішкі жолдар қосымша жөнделген.

Үшбиік ауылының тұрғыны Мейірғали Қабайұлының айтуынша, бұрын Семейге 6–7 сағат жол жүрсе, қазір бар-жоғы 2,5–3 сағатта жетуге болады.

“Жол активтері сапасының ұлттық орталығы” филиалының инженері Жасұлан Құрманғалиев:
«Құрылыс кезінде әр кезеңде сынамалар алынып, зертханада тексерілді. Қазіргі таңда жол сапасы барлық стандарттарға сай келеді», – деді.

Қазір тек екі учаскеде абаттандыру жұмыстары қалды. Жаңа трасса толық пайдалануға берілген соң, өңірдің көлік қатынасы жақсарып, транзиттік әлеуеті бұрынғыдан да арта түспек.