Қазақстанда такси бағасы бір жылда 16% ға қымбаттады

Ұлттық статистика бюросының мәліметінше, 2026 жылдың алғашқы төрт айында такси қызметі 74,5 млн жолаушы тасымалдаған. Бұл өткен жылдың сәйкес кезеңімен салыстырғанда шамамен 70%-ға көп.

Өңірлер арасында ең жоғары баға өсімі Ақмола облысы өңірінде тіркелді. Мұнда такси тарифтері бір жылда 45%-ға көтерілген.

Сарапшылар бағаның өсуін бірнеше фактормен байланыстырады. Ең алдымен, жанармай бағасы қымбаттаған. Соңғы бір жылда бензин мен өзге де жанар-жағармай өнімдерінің құны шамамен 16%-ға артқан. Сонымен қатар көлік жөндеу, қосалқы бөлшектер, техникалық қызмет көрсету және жүргізушілер еңбекақысының өсуі де тарифтерге әсер еткен.

Мамандардың айтуынша, бүгінде такси көптеген қала тұрғындары үшін қоғамдық көлікке балама емес, негізгі қатынас құралына айналып барады. Әсіресе таңғы және кешкі қарбалас уақытта, ауа райы қолайсыз күндері және жедел қатынау қажет болған жағдайда сұраныс жоғары.

Finprom.kz мәліметінше, 2025 жылдан бастап такси саласын көлеңкелі айналымнан шығару шаралары күшейтілген. Платформалық жұмыспен қамту жүйесі арқылы жүргізушілерді жеке кәсіпкер ретінде тіркеу міндеттелген.

Соның нәтижесінде 2026 жылдың қаңтар-сәуір айларында такси қызметінің ресми кірісі 84,2 млрд теңгеге жетіп, өткен жылмен салыстырғанда екі есеге жуық өскен. Ал 2025 жылдың қорытындысы бойынша елдегі такси компанияларының жиынтық табысы 186,1 млрд теңгені құраған. Оның шамамен жартысы Алматы мен Астана қалаларына тиесілі.