Қазақстанда ТҮИБ пен ПИК қоқысты бөлек жинап, қайта өңдеуге өткізгені үшін төлем ала алады

Қазақстанда көпқабатты үйлерді басқарушы ұйымдар — ТҮИБ (Тұрғын үй иелері бірлестігі), ПИК (Пәтер иелері кооперативі) және басқарушы компаниялар енді тұрмыстық қалдықтарды сұрыптап жинап, қайта өңдеуге өткізген жағдайда мемлекеттен қаржылай төлем алуға мүмкіндік алады. 

Бұл туралы Экология және табиғи ресурстар министрлігінің 2026 жылғы 9 қыркүйектегі №200 бұйрығында бекітілген.

Төлем алу үшін талаптар:

Заңды тұлға немесе жеке кәсіпкер ретінде тіркелген болуы және экология саласындағы мемлекеттік реестрде болуы қажет.

Банкроттық, қызметін тоқтату немесе тарату кезеңінде болмауы тиіс.

Аулаға кемінде екі бөлек контейнер орнату немесе арнайы уақытша сақтау алаңын жабдықтау қажет.

Үй тұрғындарының ресми келісімі хаттамамен бекітілуі тиіс.

Өтінім арнайы ақпараттық жүйе арқылы онлайн қабылданады. Құжаттар тексерілгеннен кейін ұйыммен стандартты келісімшарт жасалады.

Маңыздысы — төлем тек шынымен қайта өңдеуге жіберілген қалдықтарға ғана беріледі. Ал кәдімгі тұрмыстық қоқысқа бұл бағдарлама қолданылмайды.

Жаңа ереже тұрғын үй басқару органдарына қосымша табыс табуға мүмкіндік беріп қана қоймай, экологиялық мәдениетті арттыруға да ықпал етеді.

18 қыркүйек, 13:13