Қазақстанда жер қойнауын пайдалану және атом саласындағы цифрлық ынтымақтастық мәселелері талқыланды

Қазақстан Республикасы Өнеркәсіп және құрылыс министрлігі ҚР Атом энергиясы жөніндегі агенттігімен бірлесіп, «Ұлттық геологиялық қызмет» АҚ-ның қатысуымен жер қойнауын пайдалану саласындағы цифрлық ынтымақтастықтың өзекті мәселелерін талқылау жөніндегі кездесу ұйымдастырды.

Кездесу барысында жер қойнауын пайдалану саласындағы негізгі цифрлық құрал болып саналатын Жер қойнауын пайдаланудың бірыңғай платформасы таныстырылды. Аталған платформа мемлекеттік қызметтердің ашықтығын, тиімділігін және қолжетімділігін арттыру мақсатында әзірленген. Платформа мемлекеттік органдар мен жер қойнауын пайдаланушыларды біртұтас цифрлық кеңістікте біріктіріп, саланың барлық қатысушылары арасында үздіксіз электрондық өзара іс-қимылды қамтамасыз етеді.

Бүгінгі таңда платформада жер қойнауын пайдалану саласындағы негізгі рәсімдерді қамтитын 22 мемлекеттік қызмет цифрландырылған. Олардың қатарына өтінімдерді қабылдау, лицензия беру, электрондық аукциондар өткізу, сондай-ақ лицензиялық-келісімшарттық міндеттемелер бойынша есептілікті тапсыру үдерістері кіреді.

Кездесу барысында стратегиялық маңызы бар салаларды, оның ішінде уран өнеркәсібін қамтамасыз ету үшін платформаны пайдалану мүмкіндіктеріне ерекше назар аударылды.

Тараптар деректер мен цифрлық сервистерді интеграциялау перспективаларын талқылап, олардың қолжетімділігін арттыру мәселелерін қарастырды.

Қазақстан Республикасы Өнеркәсіп және құрылыс министрлігі мен «Ұлттық геологиялық қызмет» АҚ атом энергетикасы саласын цифрлық трансформациялау және жер қойнауын басқарудың заманауи инфрақұрылымын дамыту аясында ҚР Атом энергиясы жөніндегі агенттігімен ынтымақтастықты одан әрі кеңейтуге дайын екенін атап өтті.

Кездесу қорытындысы бойынша тараптар бірлескен жұмыстың еліміздің жер қойнауын пайдаланудың бірыңғай цифрлық экожүйесін қалыптастыруға ықпал ететініне сенім білдірді.

Бүгін, 09:34