Қазақстанда жергілікті мемлекеттік басқару кадрларын даярлаудың жаңа жүйесі енгізілді

Аталған бастама Мемлекет басшысының саяси жүйені жаңғырту және мемлекеттік басқарудың тиімділігін арттыру жөніндегі тапсырмалары аясында жүзеге асуда. Бағдарлама «Әділетті Қазақстан» қағидаттарына сәйкес халыққа жақын, ашық әрі нәтижеге бағытталған мемлекеттік аппарат қалыптастыруды көздейді.

Оқу бағдарламасының мазмұны дәстүрлі академиялық тәсілден түбегейлі ерекшеленеді. Негізгі назар теориялық білім беруге емес, басқарушылардың күнделікті қызметінде туындайтын нақты міндеттерді шешуге бағытталған. Бұл тәсіл басқарушылық шешімдердің сапасын арттыруға және өңірлік деңгейде нақты нәтижелерге қол жеткізуге мүмкіндік береді.

Бағдарлама 6 негізгі модульді қамтиды:

1. Жеке көшбасшылық – басқарушының құндылықтық негізі мен шешім қабылдау логикасы;

2. Өңірлік даму – стратегиялық жоспарлау және аумақтардың экономикалық өсу құралдары;

3. Салық саясаты – салық базасын кеңейту және нақты бюджеттік түсімдерді арттыру тетіктері;

4. Бюджеттік басқару – бюджетті қалыптастыру, құрылымы және орындалуын бақылау;

5. Коммуникациялар – халықпен, командамен және медиамен тиімді диалог орнату;

6. Саяси науқандар – құқықтық негіздер, сенім қалыптастыру және қоғамдық қолдау тетіктері.

Бағдарлама үш кезеңнен тұратын интеграцияланған модель бойынша іске асырылады.

Бірінші кезең – 3 күндік офлайн-интенсив (16-72 академиялық сағат), оның қорытындысында тыңдаушылар тест тапсырып, нақты KPI көрсеткіштерімен жобаларын қорғайды. Мысалы, жобалардың бірі ауылдық округ деңгейінде салық түсімдерін арттыруға бағытталуы мүмкін.

Екінші кезең – 2-3 айлық онлайн сүйемелдеу, бұл кезеңде қатысушылар өз жобаларын нақты жұмыс орындарында іске асырады, кейін қосымша офлайн сессияда аралық нәтижелер талданады.

Үшінші кезең – жобаларды қорытынды қорғау және тыңдаушылардың жеке рейтингісін қалыптастыру.

Оқыту процесі заманауи цифрлық білім беру платформасы (LMS/CRM) арқылы жүзеге асырылады. Платформа қатысушыларға оқу модулін, тілді, форматты, мерзімді және оқытушыны дербес таңдауға мүмкіндік береді. Сонымен қатар жүйе автоматты түрде тыңдаушылардың рейтингін қалыптастырып, оны кадрлық шешімдер қабылдауда пайдалануға негіз болады. 2026 жылдан бастап оқу процесін толық цифрландыру жоспарланған.

Бағдарлама пилоттық режимде Астана, Алматы қалаларында және Қарағанды облысында апробациядан өтті. Қазіргі таңда Шығыс Қазақстан облысында алғашқы кезең аяқталып, оған 114 басқарушы қатысты. Олардың қатарында аудан және қала әкімдері, мәслихат депутаттары және үкіметтік емес ұйымдардың өкілдері бар.

Алдағы кезеңде бағдарлама республиканың барлық өңірлерін қамтып, жергілікті деңгейдегі басқару сапасын жүйелі түрде арттыруға бағытталмақ.

Ұсынылып отырған жаңа оқу моделі - кадрлық саясатты жаңғыртудың, мемлекеттік басқару тиімділігін арттырудың және өңірлік дамуды сапалы жаңа деңгейге көтерудің маңызды құралы болып табылады.