Жергілікті мемлекеттік басқару және өзін өзі басқару туралы туралы заң талқыланды

Алматыда Парламент Мәжілісі жанындағы Қоғамдық палатаның кезекті отырысы өтті, – деп хабарлайды Aikyn.kz сайты.

Жиында жергілікті бюджетті тиімді басқару және салықтық түсімдерді реттеу, өңірлік атқарушы органдардың мәслихат алдында есеп беру жүйесін жетілдіру мәселелері талқыланды. Кездесуге Айдос Сарым бастаған Мәжіліс депутаттары, Қоғамдық палата мүшелері, орталық және жергілікті атқарушы органдардың, уәкілетті мемлекеттік мекемелердің өкілдері, қоғам қайраткерлері мен сарапшылар қатысты.

Басқосуда осыған дейін депутаттардың бастамасымен әзірленген «Қазақстан Республикасындағы жергілікті мемлекеттік басқару және өзін-өзі басқару туралы» заңға өзгерістер мен толықтырулар енгізу туралы» заң жобасы қаралды. Бұл құжат Мемлекет басшысының Қазақстан халқына Жолдауында айтылған азаматтардың жергілікті маңызы бар мәселелерді шешуге қатысу тетіктерін институционалды тұрғыдан нығайту жөніндегі саяси реформаны жүзеге асыруға бағытталған.

Жиын барысында Мәжіліс депутаты Айдос Сарым бүгінге дейін жергілікті мемлекеттік басқару және өзін-өзі басқару туралы заң қабылданғанымен, оның заңнамалық негізі әлі де жетілдіруді қажет ететінін атап өтті.

– ҚР Конституциясы қабылданған кезде «Жергілікті мемлекеттік басқару және өзін-өзі басқару туралы» заң қолданысқа енген еді. Алайда содан бері біршама уақыт өтсе де, бұл жүйе толық қалыптасып болған жоқ. Өзін-өзі басқару туралы заң – еліміз үшін тағдырлы заңдардың бірі. Үкімет бұл бастаманы Парламентке төрт рет ұсынды. Қазірге дейін жаңа жүйе бойынша 2 мыңнан астам ауыл әкімі, сондай-ақ таяуда тұңғыш рет облыс орталығының әкімі сайланды. Әрине, сын да айтылып жатыр. Бірақ ең бастысы, дәстүр қалыптаса бастады, – деді ол.

Қазіргі уақытта елімізде конституциялық реформалар жүргізіліп жатқаны белгілі. Оның аясында Парламенттің өкілеттігі мен рөлі күшейе түспек. Бұл ретте Мәжіліс депутаты осындай өзгерістер мәслихат үшін де қажет екенін түйреп өтті. Оның сөзінше, белгілі бір деңгейде кәсібиленген азаматтар ауыл, аудан және облыс мәселелерін жүйелі түрде шешуі тиіс. Сонда азаматтардың өз өңіріндегі проблемалар бойынша дау-дамай да азаяр еді.

– Негізгі мәселе – бюджеттік және салықтық қатынастарды реттеу, оларды қазіргі бюджеттік процесс жүйесіне енгізу. Жалпы мәслихаттардың облыс пен қала өміріндегі рөлі жылдан-жылға артуы тиіс. Аймақтық саяси өмір жанданып, бюджеттік мәселелер қоғам назарындағы басты тақырыптардың біріне айналуы қажет. Сонда ғана жемқорлық азайып, талап өзгереді. Ұсынылып отырған заң осындай қатынастардың құқықтық негізін қалайды. Қазір конституциялық реформа жүріп жатыр, ол аяқталған соң заңнамаға тағы да өзгерістер енуі мүмкін, – деді депутат.

Сарапшылардың пікірінше, ұсынылып отырған өзгерістер өзін-өзі басқару институттарын дамытуға, басқару мәдениетінде ашықтықты арттыруға және азаматтарды аумақтық қоғамдастықтардың дамуына белсене араласуға ынталандырады. Айдос Сарым бұл бастаманы елдің саяси мәдениетін қалыптастыруда маңызды қадам деп санайды.    

– Алматыда өзін-өзі басқару комитеттері сияқты құрылымдар бар. Олар азаматтарды біріктіріп, жергілікті деңгейдегі нақты мәселелерді шешіп жүрген ұйымдар болғандықтан, осындай бастамаларды заңмен бекіту маңызды. Мәселен, бір адам ауылға әкім болып сайланса, ол осыған дейінгі берген уәдесін орындауға міндетті, – деді А. Сарым.

Жиын соңында Мәслихат депутаттары мен қоғамдық кеңес өкілдері жергілікті өзін-өзі басқару жүйесін жетілдіруге негізделген бірқатар ұсынысын ортаға салды. Кездесу барысында айтылған ұсыныстар алдағы уақытта заң жобасын іске асыру кезінде ескеріледі.

Алтынай БАУЫРЖАНҚЫЗЫ,

Алматы қаласы