Қазақстандағы алғашқы АЭС: маңызды келісімшартқа қол қойылды

Қазақстан тарапы мен "Росатом" құрылымына кіретін компания елдегі алғашқы АЭС-ті жобалау, жабдықтарды жеткізу және салу туралы келісімшартқа қол қойды, деп хабарлайды Tengrinews.kz Атом энергиясы жөніндегі агенттікке сілтеме жасап.

Құжатқа қол қою рәсімі Владивосток қаласында ХІ Шығыс экономикалық форумы аясында өтті. Құжатқа "Қазақстандық атом электр станциялары" ЖШС мен "Росатом" мемлекеттік корпорациясының инжинирингтік компаниясы - "Атомстройэкспорт" АҚ қол қойды.

Рәсімге Қазақстанның Атом энергиясы жөніндегі агенттігінің төрағасы Алмасадам Сәтқалиев пен "Росатомның" бас директоры Алексей Лихачев қатысты.

"Келісімшартқа қол қою Қазақстандағы алғашқы АЭС құрылысы жобасының жаңа практикалық кезеңге өткенін білдіреді", - делінген ведомство хабарламасында.

Енді тараптар тиісті рәсімдерден, соның ішінде Қазақстан Үкіметімен қажетті келісулерден өтуі тиіс. Бұл талап 2026 жылғы 28 мамырдағы үкіметаралық келісімде бекітілген.

Агенттікте жобаны жүзеге асыру кезінде жергілікті қамту мәселесіне ерекше көңіл бөлінетінін атап өтті. Құрылысқа қазақстандық кәсіпорындар мен мамандарды барынша тарту, сондай-ақ отандық тауарларды, жұмыстар мен көрсетілетін қызметтерді пайдалану жоспарланған.

Ведомство мәліметінше, станция құрылысы жаңа өндіріс орындарының ашылуына, технологиялардың енгізілуіне және білікті кадрлар даярлауға септігін тигізуі тиіс. Атом энергетикасы өнеркәсіп, инфрақұрылым, цифрлық сервистер мен жасанды интеллект жүйелері тарапынан электр қуатын тұтынудың өсуі аясында елді тұрақты базалық генерациямен қамтамасыз етеді деп күтіледі.

Қол қойылған келісімшарттың құны мен жобаны іске асырудың нақты мерзімдері хабарламада көрсетілмеген.

АЭС салу туралы шешім 2024 жылғы 6 қазанда өткен республикалық референдумнан кейін қабылданды. Ресми қорытынды бойынша, бастаманы 5 561 937 қазақстандық немесе дауыс бергендердің 71,12 пайызы қолдады.

2025 жылғы маусымда "Росатом" алғашқы атом электр станциясын салатын халықаралық консорциумның көшбасшысы болып таңдалды.

Сол жылдың тамыз айында Алматы облысының Үлкен ауылы маңында инженерлік ізденістер басталды: мамандар зерттеу үшін алғашқы топырақ үлгілерін алды. Tengrinews.kz тілшілері жобаның іске қосылуы ауыл өмірін қалай өзгертетінін анықтап көрді.

Кейінірек алғашқы қазақстандық АЭС "Балқаш" атом электр станциясы" деген атау алды. Құрылыстың белсенді кезеңін 2027 жылы бастау жоспарланған.

Google News арқылы жаңалықтарымызды қадағалаңыз