Қазақстандағы жаңа вирус па әлде ЖРВИ ме: 2026 жылдың күзінде немен ауырып жатыр

Қазақстандықтар өте ауыр өтетін "оғаш" вирусқа жаппай шағымданып жатыр. Tengri Health тілшісі қазір елде қандай вирустар таралып жатқанын және олардың арасында жаңа қоздырғыш бар-жоғын анықтады.

Қазақстандықтар немен ауырып жатыр?

Біз пікір алу үшін жүгінген Денсаулық сақтау министрлігінің Санитарлық-эпидемиологиялық бақылау комитеті күз басталғалы бері Қазақстанда 492 643 ЖРВИ жағдайы тіркелгенін хабарлады. Кейінгі аптада 155 133 адам ауырып қалған - бұл былтырғы маусымның сәйкес кезеңімен салыстырғанда 5,5 пайызға аз.

Зертханалық мониторинг нәтижесі бойынша, қазір елде маусымдық респираторлық вирустар таралып жатыр.

Олардың ішінде:

риновирустар, бокавирустар, парагрипп вирустары, аденовирустар, РС-вирус және тағы басқалары.

Санэпидбақылау комитеті вирустардың мұндай айналымы үйреншікті маусымдық эпидемиологиялық жағдайға сәйкес келетінін атап өтті.

"ЖРВИ-мен сырқаттанушылықтың маусымдық өсуі әдетте қыс мезгілінде байқалады", - деп нақтылады комитет өкілдері.

Сондай-ақ қазақстандықтар арасында қызу талқыланып жатқан жаңа, ерекше вирус түрлері бар-жоғын сұрадық.

Комитет мұндай ештеңе анықталмағанына сендірді:

"Бұрын белгісіз болған вирустар, сондай-ақ жаңа қауіпті штамның пайда болу белгілері анықталған жоқ".

Бұл ретте кейбір қазақстандықтар аурудың ауыр өтуін суық тию маусымының жоғары аллергиялық белсенділік кезеңімен тұспа-тұс келуімен байланыстырады.

"Маусымдық аллергиялық реакциялар мен ЖРВИ бір мезгілде байқалып, белгілері ұқсас болуы мүмкін. Алайда аллергия мен вирустық инфекциялардың табиғаты әртүрлі, сондықтан оларды диагностикалау мен емдеуге әртүрлі тәсіл қажет", - деп атап өтті ведомство.

COVID-19 бойынша жағдай қандай?

Санэпидбақылау комитетінің деректеріне сәйкес, COVID-19 басқа респираторлық вирустармен бірге таралып жатыр.

"Айналымдағы нұсқалар халыққа қосымша қауіп төндірмейді", - деп толықтырды сарапшылар.

2026 жылдың басынан бері Қазақстанда COVID-19-дың 139 жағдайы тіркелген. Бұл 2025 жылдың сәйкес кезеңімен салыстырғанда 6,6 есе аз.

Денсаулық сақтау министрлігінің Санитарлық-эпидемиологиялық бақылау комитеті ЖРВИ, тұмау және COVID-19 бойынша эпидемиологиялық жағдайды бақылауда ұстап отыр.

Еске сала кетейік, Қазақстанда тұмауға қарсы жыл сайынғы екпе науқаны басталды. Елге сатып алынған 2,1 миллион доза вакцинаның алғашқы 564 мыңы жеткізілді. Ол кімдерге арналған және қай жерде салынатыны туралы мына жерден оқыңыз.

Бізді Google-дың негізгі дереккөздер тізіміне қосыңыз

Қосу

жрви

Денсаулық

Қазақстан

ауру