Қазақстандық көлігіне түскен мұз бен қар үшін 2 миллион теңге өндіріп алды

Қостанай қалалық соты ғимарат шатырынан мұз құлауы салдарынан келтірілген материалдық шығынды өндіру туралы істі қарады, деп хабарлайды Tengri Auto.

Не болды?

Сотта анықталғандай, 2026 жылдың наурызында ғимарат шатырынан тұраққа қойылған автокөлікке қар мен мұз массасы құлаған. Салдарынан көлікке механикалық зақым келтірілді. Сарапшылар қорытындысына сәйкес, қалпына келтіру жұмыстарының құны 1,8 миллион теңге болса, тағы 180 мың теңге көліктің тауарлық құнын жоғалту сомасы ретінде есептелген.

Жауапкер талап арызбен келіспеді. Оның айтуынша, учаскеде қар мен мұздың түсуі мүмкін екені туралы ескерту орналастырылған.

Алайда сот ұсынылған суреттер ескертудің нақты қашан дайындалып, қашан қойылғанын анықтауға мүмкіндік бермейтінін белгіледі. Сонымен қатар оқиғадан кейін түсірілген бейнежазба мұз құлаған күні оқиға орнында ескерту белгілері мен хабарландыру болмағанын көрсетті.

Сот жеке кәсіпкер зиянның алдын алу үшін барлық қажетті шараларды қолданбаған деген қорытындыға келді.

Нәтижесінде талап арыз қанағаттандырылды. Сот кәсіпкерден автокөлік иесінің пайдасына, қалпына келтіру жөндеуі мен тауарлық құнын жоғалту өтемақысын қоса алғанда, 2 миллион теңгеге жуық қаражат өндіріп алды.

Сот шешімі заңды күшіне енген жоқ.

Көлікке мұз құлаған жағдайда не істеу керек?

Егер автокөлік шатырдан қар немесе мұз түсуінен зақымдалса, заңгерлер бірден оқиға мән-жайын тіркеп алуға кеңес береді.

Ең алдымен мыналарды орындау қажет:

оқиғаны рәсімдеу үшін полиция шақырту; автокөліктегі зақымдарды, оқиға орнын, ғимарат шатырын және ескерту белгілерінің жоқтығын (немесе барын) фотоға немесе видеоға түсіру; мүмкіндігінше куәгерлердің байланыс мәліметтерін жазып алу; оқиға туралы құжаттарды алу; қалпына келтіру жөндеуі құнын және қажет болған жағдайда көліктің тауарлық құнын жоғалту сомасын тәуелсіз бағалаудан өткізу.

Осыдан кейін ғимарат иесіне немесе оны күтіп ұстауға жауапты ұйымға зиянды ерікті түрде өтеу туралы талап-арыз жолдауға болады. Егер өзара келісімге келу мүмкін болмаса, келесі қадам сотқа жүгіну болмақ.

Мұндай істерді қарау кезінде сот, әдетте, бірнеше мән-жайды бағалайды: ғимаратты күтіп ұстауға кім жауапты, шатырды қар мен мұздан тазарту шаралары жүргізілді ме, ескерту қоршаулары немесе белгілері орнатылды ма, сондай-ақ келтірілген шығын көлемі дәлелденді ме.

Бұған дейін көлікке ағаш құласа не істеу керек екенін жазған болатынбыз. Толық нұсқаулық мына материалда.

Тағы оқыңыз: Көлікті ауызша сатып, ақшасын ала алмаған: Қызылордадағы дау сотта шешілді

Google News арқылы жаңалықтарымызды қадағалаңыз

Жазылу