Қазақстандық әйел аяғын сындырып алғаннан кейін әкімдіктен жарты миллион теңге өндіріп алды

Петропавлда көшедегі терең шұңқырға түсіп кетіп, аяғын сындырып алған әйел қалалық әкімдіктен жарты миллион теңге өндіріп алды, деп хабарлайды Tengrinews.kz.

Петропавлда көшедегі терең шұңқырға түсіп кетіп, аяғын сындырып алған әйел қалалық әкімдіктен жарты миллион теңге өндіріп алды, деп хабарлайды Tengrinews.kz.

Солтүстік Қазақстан облыстық сотының баспасөз қызметі істің мән-жайын айтып берді. Былтыр тамызда Петропавл тұрғыны кішкентай қызымен бірге қаланың орталық көшелерінің бірінде келе жатқан. Бір сәтте ол тротуардан шығып кетіп, денесінің оң жақ бөлігімен ақпа суға толған шұңқырға құлаған.
Оқиға Интернациональная көшесіндегі ескі ғимараттың жанында болған.

Шұңқыр қалың шөптің арасында көрінбей қалған, сонымен қатар оқиға орнында ешқандай ескерту белгілері немесе қоршаулар болмаған.

Зардап шегуші ауруханаға жүгінген, дәрігерлер табан сүйегінің ығысусыз сынуын, сондай-ақ сол жақ иық буынының капсула-байлам аппаратының созылуын анықтаған. Кейінірек сарапшылар денсаулыққа келтірілген зиянды орташа ауырлық деңгейінде деп бағалаған.

Әйел полицияға арыз жазған, бірақ қылмыс құрамы мен қылмыстық теріс қылық белгілерінің болмауына байланысты материал тіркелмеген. Зардап шегуші Петропавл әкімдігінің ТҮКШ бөліміне қала орталығында мұндай қауіпті шұңқырдың пайда болуына кінәлілерді анықтауды, сондай-ақ жағдай қайталанбауы үшін учаскені қоршауды жазбаша түрде талап еткен.

Айта кетейік, оқиғадан бір ай өткен соң бөлім қызметкерлері оқиға орнына барып, шұңқырды тауып, коммуналдық қызметтер оны көмген.

Зардап шеккен әйел екі айдан астам уақыт жұмыс істей алмай, аяғы гипсте болған. 2025 жылы қазанда ол қалалық әкімдіктің ТҮКШ бөліміне сотқа дейінгі шағым түсіріп, үш миллион теңге көлемінде моральдық зиян өтеуін талап етті. Алайда әкімдік бұл шұңқыр үшін ешқандай жауапкершілік көтермейтінін айтып, шағымды мойындамаған.

Содан кейін әйел қалалық әкімдіктің ТҮКШ бөліміне қарсы сотқа талап арыз берді.

"Талап қоюшы алған жарақатының салдарынан жұмысқа бара алмағанын, бұл оның мүліктік жағдайына әсер еткенін көрсетті. Ал оқиға кезінде қасында қызы болған, ол да терең шұңқырға түсіп кетуі мүмкін еді, осындай ойлардан талап қоюшы қатты күйзеліске түскен. Ол жарақатты жауапкердің кінәсінен алдым деп санайды, өйткені ашық шұңқыры бар жер учаскесі тротуардың жанында, қала орталығында орналасқан және жауапкер бұл жерлерге бақылау жасауы тиіс. Талап арызды толық көлемде қанағаттандыруды, 3 миллион теңге көлемінде өтемақы өндіруді және іс бойынша жұмсалған барлық сот шығындарын өтеуді сұрайды", - делінген Петропавл қалалық № 2 сотының шешімінде.

Қалалық әкімдік өздерінің тиісті жауапкер емес екенін алға тартып, талап арыздан бас тартуды сұрады. ТҮКШ бөлімі шұңқыр қалалық кәсіпорындардың біріне тиесілі темірбетон тіректерді сапасыз демонтаждаудан кейін пайда болған деп сендірді. Алайда сот әйел құлаған жердің демонтаж жұмыстарына қатысы жоқ екенін және оның сипаты басқаша екенін анықтады. Нәтижесінде жауапкер мұны мойындауға мәжбүр болды.

Фото Tengrinews.kz

Қалалық әкімдік өкілдері тиісті жауапкерлер жақын маңдағы ғимараттардың иелері болуы тиіс деп дәлелдеуге тырысты, өйткені олар іргелес аумақты қадағалауы керек екен. Үшінші тұлға ретінде іске жақын маңдағы 1920 жылы салынған бес пәтерлі үйдің иелері де тартылды. Алайда олар ғимараттың апатты жағдайда екенін, көптен бері бос тұрғанын және электр желісінен ажыратылғанын түсіндірді.
Сот тіпті маман - жерге орналастырушы техниктің қатысуымен көшпелі отырыс өткізді. Ол шұңқырдың қала жерінде орналасқанын растап, дауға нүкте қойды.

"Сот келтірілген зиянға ТҮКШ бөлімі жауапты деген қорытындыға келді, өйткені шұңқыр (ақау) қала жерінің аумағында, тротуардың жанында орналасқан. Бұл қала орталығы, күн сайын көптеген азамат өтетін аялдаманың маңы. Жауапкер қала жерлерін қауіпсіз күйде ұстауға, абаттандыруға, тротуарларға, жаяу жүргіншілер аймақтарына және тротуарға іргелес аумақтарға жауап беруге міндетті. Сот жауапкердің ортақ пайдаланылатын жерлерді тиісінше күтіп-ұстамауынан көрінген әрекетсіздігін анықтады", - делінген сот шешімінде.

Сот қала тұрғынының тұрғын үй-коммуналдық шаруашылық бөліміне қойған талап арызын ішінара қанағаттандырып, 500 мың теңге көлемінде моральдық зиян өтемақысын, сондай-ақ сот шығындарын өндіру туралы шешім шығарды.

Шешім заңды күшіне енді. Апелляциялық инстанция оны өзгеріссіз қалдырды.

Google News арқылы жаңалықтарымызды қадағалаңыз