Қарағандыда тауға шыққан ер адам аяғын сындырып алды

АСТАНА, 20 мамыр – Sputnik. ТЖМ құтқарушылары таудағы ерлі-зайыптыларға көмекке келді, деп хабарлады төтенше жағдайлар министрлігі.

Қарағанды облысының Қарқаралы ауданындағы "Пионерлер шыңы" аумағында құтқарушылар екі туристі эвакуациялау бойынша іздестіру-құтқару жұмыстарын жүргізді.

Белгілі болғандай, таңертең саяхатшылар тауға көтерілген. Алайда түсу кезінде ер адам аяғын сындырып алып, екеуі өздігінен төмен түсе алмаған.

Іздестіру жұмыстарын жүргізу үшін ұшқышсыз ұшу аппараты пайдаланылды. Оның көмегімен туристердің нақты орналасқан жері жедел анықталды. Кейін ТЖМ қызметкерлері зардап шеккендерге көтеріліп барып, оларды таудан аман-есен эвакуациялады.

Құтқарушылардың жедел әрі үйлесімді әрекеттерінің арқасында ерлі-зайыптылар қауіпсіз жерге жеткізілді.