Қазақстандықтарды ең көп алаңдататын қымбатшылық: ет пен коммуналдық қызмет көш бастап тұр

Қазақстан тұрғындары арасында бағаның өсуіне қатысты алаңдаушылықтың негізгі себептері өзгеріссіз қалды, – деп хабарлайды Aikyn.kz сайты. 

Ұлттық банктің шілде айында жүргізген инфляциялық күтулер зерттеуіне сәйкес, ет пен құс еті, сондай-ақ тұрғын үй-коммуналдық қызметтер бағасының қымбаттауы қазақстандықтарды ең көп алаңдатады.

Респонденттердің 59,9%-ы ет пен құс етінің бағасы айтарлықтай өскенін атап өткен. Екінші орында тұрғын үй және коммуналдық қызметтер тұр — бұл шығындардың қымбаттағанын сауалнамаға қатысқандардың 56%-ы айтқан.

Одан кейін дәрі-дәрмек бағасы (51,6%) және ірімшік пен шұжық өнімдері (49,2%) келеді.

Маусым айымен салыстырғанда көрсеткіштер айтарлықтай өзгермеген. Ол кезде ет пен құс етінің қымбаттауын респонденттердің 61,1%-ы, ал коммуналдық қызметтердің өсуін 56,3%-ы негізгі мәселе ретінде атаған.

Ал жеміс-жидек пен көкөніс бағасына алаңдайтындардың үлесі төмендеген. Маусымда бұл көрсеткіш 54,4% болса, шілдеде 47,3%-ға дейін азайған.

Осылайша, шілде айында қазақстандықтардың инфляциялық күтулерінде азық-түлік бағасы мен коммуналдық шығындардың өсуі басты мәселе болып қала берді.