​Қазақстандықтардың зейнетақысынан 20 пайыз ұстала ма? Ресми жауап

Әлеуметтік желілер мен мессенджерлерде Қазақстандағы ынтымақты зейнетақы төлемдері 20 пайызға азайтылады-мыс деген бейнеролик тарап жатыр. Бұл ақпарат шындыққа жанаспайды.

Анықталғандай, алаяқтар шынайы көрінетін, бірақ мүлдем жалған видео жасау үшін deepfake технологиясын пайдаланған. Еңбек және халықты әлеуметтік қорғау министрлігі зейнетақыдан ақша ұсталатыны туралы қауесетті ресми түрде теріске шығарды.

Керісінше, мамандар 2026 жылдың 1 қаңтарынан бастап елдегі базалық және ынтымақты зейнетақы мөлшері инфляция деңгейіне сәйкес 10 пайызға өскенін еске салды.

2026 жылы зейнетақы шын мәнінде қалай өзгерді:

Ең төменгі базалық зейнетақы — 35 596 теңгеге дейін өсті (ең төменгі күнкөріс деңгейінің 70%-ы);

Ең жоғары базалық зейнетақы — 60 005 теңгеге дейін ұлғайтылды (ең төменгі күнкөріс деңгейінің 118%-ы).

«Азаматтардан арандатушылыққа бой алдырмауды және тек ресми ақпарат көздеріне сенуді сұраймыз. Көрінеу жалған мәліметтер таратқаны үшін ҚР заңнамасына сәйкес жауапкершілік қарастырылғанын ескертеміз», — деп атап өтті ведомстводан.

Естеріңізге сала кетейік, Мемлекет басшысының тапсырмасына сәйкес, Қазақстанда 2023 жылы басталған және бес жылға есептелген ең төменгі базалық зейнетақыны кезең-кезеңімен арттыру жұмыстары жалғасуда. Осы кезеңнің соңына қарай ең төменгі мөлшер — 70 пайызға, ал ең жоғары мөлшер ең төменгі күнкөріс деңгейінің 120 пайызына жетуі тиіс.

Бүгін, 15:15