Қазақстандықтарға 21,6 миллион теңге мен 5 жыл бас бостандығынан айыруға әкеп соғуы мүмкін сөздер туралы ескертілді

Достар арасында "бомба" деген сөз сәтсіз әзіл болуы мүмкін. Ал ұшақ бортында бұл сөз мүлдем басқа жағдайға - тексеру, қауіпсіздік қызметінің жұмысы және рейстің кешігуіне себеп болады, - деп хабарлайды Tengri Travel.

Қандай сөздерді айтуға болмайды?

Көлік министрлігі жолаушыларға үндеу жасап, ұшақ ішіндегі абайсыз айтылған сөздер рейстің кешігуіне және жауапкершілікке әкеп соғуы мүмкін екенін ескертті

"Авиацияда "бомба", "жарылғыш зат", "террорист", "қару", "ұшақты басып алу" сияқты және басқа да сөздер қауіпсіздікке қатер төнгенін білдіруі мүмкін. Кез келген ықтимал қауіп туралы ақпарат маңызды деп қабылданады, ал экипаж бен авиациялық қауіпсіздік қызметтері бекітілген процедуралар бойынша әрекет етуге міндетті", – деп хабарлады ведомство.

Әңгіме тек сөздер туралы емес. Жолаушыларға мына тақырыптарда әзілдемеуге кеңес берілді:

бомба мен жарылғыш заттар; қару мен тапанша; террористер мен теракт; ұшақты басып алу; жолаушыларға немесе экипажға зиян келтіру ниеті; жүкте немесе қол жүгінде қауіпті заттардың болуы.

Бұл ретте фразаның әзілмен немесе шын айтылғаны маңызды емес. Экипаж мүшелері мұны жай ажырата алмайды, сондықтан мұндай мәлімдемелерді ықтимал қауіп ретінде қабылдауға міндетті.

Әуежайда және ұшақта қандай сөздерді айтуға болмайды. Иллюстрация: Көлік министрлігі

Жолаушы "бомба" деген сөзі үшін рейстен шығарылды

Сондай-ақ ведомство жақында Алматы – Ақтау рейсінде болған жағдайды еске салды. Жолаушылардың бірі "бомба" деген сөзді айтқан.

Оқиға орнына бірден авиациялық қауіпсіздік және көлік полициясы қызметкерлері келген. Ер адам рейстен шығарылып, ұсақ бұзақылығы үшін жауапқа тартылды, ал ұшақ екі сағатқа жуық кешігіп ұшты. Іс материалдары шешім қабылдау үшін сотқа жолданды.

Министрлік мәліметінше, мұндай сөздер арнайы қызметтердің шұғыл тексеруіне себеп болады, бұл эвакуацияға, ұшақты ауыстыруға және рейстердің сағаттап кешігуіне әкелуі мүмкін. Мұндай жағдайлар әуежайлар мен әуекомпаниялар үшін үлкен шығынға айналады.

Жалған хабарлама үшін қандай жаза қарастырылған?

Министрлік Қазақстанда дайындалып жатқан терроризм актісі туралы көрінеу жалған хабарлағаны үшін Қылмыстық кодекстің 273-бабы бойынша қылмыстық жауапкершілік қарастырылғанын еске салды.

Терроризм актісі туралы жалған хабарлама үшін 5000 АЕК-ке дейін (21 миллион 625 мың теңге) айыппұл, түзеу жұмыстары, бес жылға дейінгі мерзімге бас бостандығын шектеу немесе одан айыру жазасы қолданылуы мүмкін.

Ведомство жолаушыларды мынаны есте сақтауға шақырды: абайсыз айтылған бір ауыз сөз тек сіздің рейсіңізді кешіктіріп қана қоймай, басқа да жүздеген жолаушы үшін қиындық тудыруы мүмкін.

Тағы оқыңыз: Рейстер тоқтатыла бастады: Қазақстаннан Ресейге әуе қатынасы не болып жатыр?

Бізді Google-дың негізгі дереккөздер тізіміне қосыңыз

Қосу