8,7 миллион теңгеге дейін айыппұл. Қазақстандықтарға жұлынған сирень үшін жаза туралы ескертілді

Көктем шыға салысымен Қазақстан қалаларында сирень қайта гүлдеді, алайда оның хош иісімен бірге жыл сайын қайталанатын мәселе де оралды. Тұрғындар бұтақтар сындырылып, бұталар толығымен дерлік жұлынғанына шағымданып жатыр, ал әлеуметтік желілерде "бұл әрекетті зиянсыз әдет деп санауға бола ма?" деген мәселе талқыланып жатыр. Tengri Life қоғамдық орындарда сирень жұлғаны үшін қандай жаза қарастырылғанын анықтады.

Көктем шыға салысымен Қазақстан қалаларында сирень қайта гүлдеді, алайда оның хош иісімен бірге жыл сайын қайталанатын мәселе де оралды. Тұрғындар бұтақтар сындырылып, бұталар толығымен дерлік жұлынғанына шағымданып жатыр, ал әлеуметтік желілерде "бұл әрекетті зиянсыз әдет деп санауға бола ма?" деген мәселе талқыланып жатыр. Tengri Life қоғамдық орындарда сирень жұлғаны үшін қандай жаза қарастырылғанын анықтады.

Бұл неден басталды?

Биыл Алматыда сирень, яғни мамыргүл ерте гүлдеді, осыған байланысты тегін гүл шоқтарын жинау "маусымы" да көп күттірген жоқ.

"Менің бүкіл балалық шағымда Алматыда сирень өсетін. Ол қайда кетті?" - деп сұрақ қояды қазақстандықтар.

Скриншот: Threads

Әлеуметтік желілерде сынған бұталардың суреттері пайда бола бастады.

"Біздің тұрғын ұй кешенінде ол бар, терезенің алдына өзіміз ектік. Оны жұлуға ешкімге рұқсат жоқ, көршілер мұндай "тегін дүниеге" құмарларды қуып жүреді. Бізде сирень - тамашалау үшін", "Бір әйел әр бұтадан өзіне қолға сыймайтын үлкен гүл шоғын жасап алды", "Күн сайын осы көріністі көремін", "Ағашта гүлшоғыры қалмады десе де болады", "Ағаш обал болды, өсе берсе болар еді", - деп жазады желі қолданушылары.

Жеке үй тұрғындары да бірнеше жыл бойы күтіп-баптаған бұталарын гүлдеп үлгермей жатып жұлып кететініне шағымданады.

"Анам сирень еккен еді, ал жас жігіттер оны бұтақтарымен жұлып алып жатыр", "Барлық сиреньді гүл ашпай тұрып жұлып кетіпті", - деп бөлісті пікір қалдырушылар.

Осы жағдайларға байланысты әлеуметтік желілерде "Бұл үшін жауапкершілікке тартуға бола ма?" деген сұрақ жиі қойылып жатыр.

ІІМ не дейді?

Қала аумағындағы барлық өсімдік, ағаштардан бастап қарапайым шөпке дейін, ресми түрде жасыл желек деп аталады. Олар сән үшін ғана емес, олардың маңызды санитарлық, әлеуметтік және қорғаныс функциялары бар.

Ережеге сәйкес, саябақтар мен скверлердегі тәртіпке әкімдіктер, ал кәсіпорындар немесе жеке нысандар аумағындағы екпелерге олардың иелері жауапты. Бірақ бұл көпқабатты үйдің ауласындағы сирень бұтағы иесіз дегенді білдірмейді.

"Саябақтарда, скверлерде, көше бойында, көппәтерлі тұрғын үйлердің аулаларында және басқа да қоғамдық орындарда сирень бұтақтарын және өзге де жасыл желектерді жұлу абаттандыру ережелерін бұзу және қоршаған ортаға залал келтіру ретінде қарастырылуы мүмкін", - деп түсіндірді ІІМ баспасөз қызметі.

Егер сіз қоғамдық орындағы бұтақты сындырсаңыз, бұл әрекетіңіз Әкімшілік құқық бұзушылық туралы кодекстің 505-бабына ("Қалалар мен елді мекендердің аумақтарын абаттандыру қағидаларын бұзу, сондай-ақ инфрақұрылым объектілерін бұзу, қала мен елді мекендердің жасыл екпелерін жою және зақымдау") жатады.

Бұл үшін ескерту жасау немесе айыппұл қарастырылған. Жеке тұлғалар үшін айыппұл мөлшері 20 АЕК (86 500 теңге). Егер құқық бұзушылық бір жыл ішінде қайталанса, айыппұл 30 АЕК-ке (129 750 теңге) дейін артады. Бизнес пен ұйымдар үшін бұдан да жоғары айыппұлдар қарастырылған.

Дегенмен келтірілген залал айтарлықтай болса, жағдай Қылмыстық кодекстің 340-бабына "Ағаштар мен бұталарды заңсыз кесу, жою немесе зақымдау" бойынша қаралуы мүмкін.

ІІМ-нің мәліметінше, бұл бап бойынша жаза 160 айлық есептік көрсеткішке дейінгі мөлшерде айыппұлды (692 мың теңге), сол мөлшердегі түзеу жұмыстарын, 160 сағатқа дейінгі мерзімге қоғамдық жұмыстарды немесе 40 тәулікке дейінгі мерзімге қамауға алуды қамтуы мүмкін. Сондай-ақ мүлікті тәркілеу қарастырылған.

Егер сирень жеке аумақта жұлынса?

Ведомство өкілдері сирень бұталары жеке үйдің ауласында, жер учаскесінде немесе үй маңындағы аумақта өсіп тұрған жағдайларға да ерекше тоқталды. Егер жасыл желекке бөгде тұлғалар зақым келтірсе, меншік иесі полицияға жүгінуге құқылы.

Мұндай жағдайда жауапкершілік Қылмыстық кодекстің 202-бабы ("Бөтеннің мүлкін қасақана жою немесе бүлдіру") бойынша туындауы мүмкін.

Егер иесіне айтарлықтай залал келтірілсе, жаза қатаңырақ болады: 500-ден 2000 АЕК-ке дейінгі (2,2 миллионнан 8,7 миллион теңгеге дейін) айыппұлдан бастап, екі жылға дейінгі мерзімге бас бостандығын шектеуге немесе одан айыруға дейін.

Құқық бұзушылық туралы қалай хабарлауға болады?

ІІМ мәліметінше, арызды аумақтық ішкі істер органына, 102 сенім телефонына, сондай-ақ e-Otinish пен "Заң және Тәртіп" сервистері арқылы беруге болады. Өтінішке дәлелдемені қоса беру ұсынылады.

"Өтінішке фото және бейнематериалдарды, куәгерлер туралы мәліметтерді, өзге де растаушы материалдарды қоса беру ұсынылады. Өтінішті қарау нәтижелері бойынша Қазақстан заңнамасына сәйкес процестік шешім қабылданады", - деді ведомство өкілдері.

Тағы оқыңыз: Бақбақ, жусан, қызғалдақ: қай гүлді терген үшін 13 миллион теңге айыппұл салынуы мүмкін?

Google News арқылы жаңалықтарымызды қадағалаңыз

Жазылу