Қырғызстаннан ұшатын қазақстандықтарға маңызды өзгерістер туралы ескертілді

Жақын күндері Ыстықкөлдегі Тамшы әуежайынан ұшуды жоспарлап отырған қазақстандықтарға әуежайға алдын ала шығу ұсынылды, деп хабарлайды Tengri Travel.

FlyArystan ақпаратынша, 30 шілде мен 2 тамыз аралығында Ыстықкөл аумағында көлік қозғалысына уақытша шектеулер енгізіледі. Бұл халықаралық спорттық іс-шараның өткізілуіне байланысты.

"30 шілде мен 2 тамыз аралығында Ыстықкөлде халықаралық спорттық іс-шараның өтуіне байланысты көлік қозғалысына уақытша шектеулер қойылады. Шектеулер, соның ішінде, Шолпан-Ата – Тамшы әуежайы бағытына да әсер етеді", - деп хабарлады тасымалдаушы.

Жолаушыларға терминалға дейінгі жолға көбірек уақыт арнап, соңғы сәтте шықпауға кеңес берілді.

"Осыған байланысты жол жағдайындағы ықтимал өзгерістерді ескеріп, әуежайға алдын ала шығуыңызды сұраймыз. Ұшу алдындағы барлық процедурадан уақытылы өту үшін әуежайға ұшуға дейін кемінде 3 сағат бұрын келуді ұсынамыз", - делінген авиакомпания хабарламасында.

Бұл ұсыныс тек рейске тіркелу, жүкті тапсыру және ұшу алдындағы бақылаудан өтуге қажетті уақытқа ғана қатысты емес. Қосымша уақыт қоры уақытша шектеулерге байланысты әуежайға баратын жолдағы қозғалыс әдеттегіден баяу болған жағдайда ұшақтан кешігіп қалу қаупінің алдын алуға мүмкіндік береді.

Бұған дейін біз Ыстықкөлге сапар алдында білуіңіз керек негізгі жайттарды: баруға ең қолайлы уақытты, кіру ережелерін, бағыт нұсқаларын, өзекті бағалар мен қажетті заттар тізімін жинақтаған болатынбыз. Толығырақ - материалымызда.

Google News арқылы жаңалықтарымызды қадағалаңыз