Астанадан ұшатын жолаушыларға өзгерістер туралы ескертілді

Астана әуежайы жолаушыларға жөндеу жұмыстарының басталғаны туралы ескертіп, ұшу алдындағы тексерістен өту кезінде кідіріс болдырмау үшін сапарға алдын ала дайындалуды сұрады, деп хабарлайды Tengri Travel.

Астана әуежайы жолаушыларға жөндеу жұмыстарының басталғаны туралы ескертіп, ұшу алдындағы тексерістен өту кезінде кідіріс болдырмау үшін сапарға алдын ала дайындалуды сұрады, деп хабарлайды Tengri Travel.

Әуе айлағы баспасөз қызметі мәліметінше, бүгіннен бастап аумақта жөндеу жұмыстары жүргізіледі.

"Тексерістен өтер кезде өзге жолаушыларды көп күттірмеу үшін қол жүгін және багажды үйден шықпас бұрын алдын ала тексеріп, тыйым салынған заттар тізімімен танысып алуды сұраймыз. Сіздің алдын ала дайындығыңыз сапарыңыздың тыныш әрі жайлы басталуына көмектеседі", - деді әуежай өкілдері.

Еске сала кетейік, әуежайдың ұшу-қону жолағында 2026 жылдың 15 сәуірі мен 31 мамыры аралығында жоспарлы жұмыстар жүргізіледі. Жөндеу жұмыстары күн сайын сағат 10:00-ден 18:00-ге дейін жалғасады.

"Осы кезеңге сәйкес келетін рейстердің барлығы алдын ала қайта жоспарланып, ертерек немесе кешірек уақытқа ауыстырылды. Осыған байланысты сапарыңызды жоспарлау барысында рейс уақытына қатысты ақпаратты алдын ала нақтылап алуларыңызды сұраймыз", - деді баспасөз қызметі.

Тіркеу және тексеру аймақтарында кептеліс болмауы үшін әуе айлағы әуежайға алдын ала келуді ұсынады:

ішкі рейстер бойынша ұшуға дейін кемінде 2 сағат бұрын; халықаралық рейстер бойынша ұшуға дейін кемінде 3 сағат бұрын.

Баспасөз қызметі терминал мен жолаушыларға қызмет көрсету аймақтары штаттық режимде жұмысын жалғастыратынын айтты.

Әуежай өкілдері жүргізіліп жатқан жұмыстар ұшу қауіпсіздігі мәселелерімен және инфрақұрылымды жаңартумен байланысты деп түсіндірді.

Еске сала кетейік, 2025 жылғы қарашада Нұрсұлтан Назарбаев әуежайын басқарған Terminals Holding (БАӘ) жобадан шығуға дайындалып жатқаны белгілі болған. Астана әкімдігі келіссөздерге қарамастан, әуежай бұрынғы режимде жұмысын жалғастыратынын хабарлады.

Былтыр 31 қазанда әуежайда 1 қыркүйектен бастап (5-7 қыркүйек аралығын қоспағанда) жүргізілген ұшу-қону жолағын жөндеудің жоспарлы кезеңі аяқталды.

Баспасөз қызметінің мәліметінше, бұл уақытта ұшу мен қону сағат 10:00-ге дейін және 18:00-ден кейін орындалды, бірақ рейстер тоқтатылмады. Әуежай мәліметтеріне сәйкес, жүргізілген жұмыстар "аэродром инфрақұрылымын сенімдірек етіп, ұшу қауіпсіздігінің халықаралық стандарттарына сәйкес келтірді".

Бұл ретте әуежай 2026 жылы жөндеу шараларының келесі кезеңі жоспарланғанын хабарлады. Жұмыс жоспарына ұшу-қону жолағының жекелеген учаскелері, магистральды рулеж жолы мен перрон инфрақұрылымы енгізілген.

Google News арқылы жаңалықтарымызды қадағалаңыз

Жазылу