Қазақстандықтарға дәрігерге барғаннан кейін бірден күдікті қоңыраулар түсе бастады

Қазақстандықтар емханаға барғаннан кейін күдікті қоңыраулар келетініне шағымданып жатыр: белгісіз біреулер өздерін дәрігер ретінде таныстырып, кодты айтуды сұрайды, кейіннен несиелер туралы хабарламалар келе бастайды. Бұл деректердің тарап кетуімен байланысты ма - TengriHealth тілшісі анықтап көрді.

Қазақстандықтар емханаға барғаннан кейін күдікті қоңыраулар келетініне шағымданып жатыр: белгісіз біреулер өздерін дәрігер ретінде таныстырып, кодты айтуды сұрайды, кейіннен несиелер туралы хабарламалар келе бастайды. Бұл деректердің тарап кетуімен байланысты ма - TengriHealth тілшісі анықтап көрді.

Қабылдаудан кейінгі қоңыраулар

Әлеуметтік желілерде бір қазақстандықтың айтуынша, оның 77 жастағы анасына өзін дәрігермін деп таныстырған алаяқ қоңырау шалған. Зейнеткер бұған күмәнданбаған, себебі қоңырау ол емханадан шыға бергенде келген.

"Мен иммунолог-дәрігермін, сізді маған жіберді. Қабылдауға жазамын, талдаулармен келіңіз. Қазір код келді, жазылу үшін соны айтыңыз", - деген қоңырау шалушы. Бұны егде әйел қызына айтып берген.

Қабылдау кезінде оған расымен де бүйрегін тексертуге кеңес берілгендіктен, бұл өтініш оғаш көрінбей, зейнеткер кодты айтып берген.

Осы қоңыраудан кейін оның телефонына банктерден рәсімделген несиелер туралы хабарламалар келе бастаған. Қызының айтуынша, ол уақытында көріп үлгерген.

"Мен емханаға хабарластым, диспетчер олардың ешқашан код сұрамайтынын айтты. Хабарламалар келген кезде мен бәрін тоқтаттым", - деді әйел.

Кейін банкте оған несиелердің рәсімделмегенін растаған.

Пікір қалдырған қолданушылардың бірі "несие мақұлданды" деген тіркес алаяқтық схеманың бір бөлігі екенін атап өтті.

"Алаяқтар осылайша адамды қорқытып, атыңызға несие алып жатыр деп сендіреді. Ол ештеңені түсінбей, абдырап қалғанда, ІІМ-нен хабарласып тұрмыз деп, ақшаны қауіпсіз шотқа аударуды сұрайды. Осы кезде адам шынымен несие рәсімдеп, ақшаны аударып жібереді".

Threads-тегі жазба астындағы пікірлер

Басқа қазақстандықтар да осыған ұқсас оқиғалармен бөлісті және олардың сценарийі әдетте бірдей:

Алдымен адам емханаға барады немесе қабылдауға жазылады. Кейін оған белгісіз нөмірден өзін дәрігер ретінде таныстырып, жеке деректерін атайтын біреу хабарласады. Бұдан әрі қабылдауға шақырып, жазбаны код арқылы растауды сұрайды.

Желі қолданушылары бұл жағдай деректердің тарап кетуімен байланысты болуы мүмкін деп алаңдаулы.

Threads-тегі жазба астындағы пікірлер

Денсаулық сақтау министрлігі не дейді?

Денсаулық сақтау министрлігінің баспасөз қызметі мәліметтердің тарауы мүмкін екені туралы азаматтардың ресми өтініштері түскен жағдайда, уәкілетті органдардың қатысуымен тексерулер жүргізілетінін хабарлады.

Сонымен қатар, министрлік бұл жағдайлар алаяқтардың кең таралған схемасына көбірек ұқсайтынын атап өтті.

"Айта кетейік, DamuMed-ті қоса алғанда, медициналық ақпараттық жүйелер ақпараттық қауіпсіздік талаптарын сақтай отырып жұмыс істейді. Бүгінде пациенттердің келуін нақты уақыт режимінде бақылауға мүмкіндік беретін жүйені бұзу немесе оған рұқсатсыз кіру деректері расталған жоқ", - деді министрліктегілер.

Дәрігерге жазылу қалай жүзеге асады?

Баспасөз қызметі қабылдауға жазылу электрондық үкімет порталы, мобильді қосымшалар немесе тіркеу бөлімі арқылы жүзеге асырылатынын еске салды.

Ал SMS-кодтар тек цифрлық сервистерге кіру үшін ғана келуі мүмкін, бірақ медициналық ұйым қызметкерлері оларды ешқашан телефон арқылы сұрамайды.

Сондай-ақ, мұндай алаяқтық жағдайлары түрлі өңірлерде тіркеліп жатқаны және көбінесе қарт адамдарға бағытталғаны қосымша айтылды.

"Бұл жағдайлар, әдетте, медициналық ұйымдардың қызметіне емес, алаяқтардың әрекетіне байланысты", — делінген хабарламада.

Қазақстандықтарды келесі ережелерді сақтауға шақырады:

SMS-кодтар мен дербес деректерді хабарламау; телефон арқылы алынған кез келген ақпаратты тексеру; күдікті қоңыраулар болған жағдайда емханаға немесе құқық қорғау органдарына хабарласу.

Следите за нашими новостями в Google News

Подписаться