Қазақстанға әкелінген автомобильдерді тексеру процедурасы өзгереді

Қазақстанда көлік құралдары конструкциясының қауіпсіздігі туралы куәлікті (КҚКҚК) беру үшін көліктерге сынақ жүргізетін зертханаларды тексеру ережесі өзгерді, деп хабарлайды Tengri Auto Сауда және интеграция министрлігіне сілтеме жасап.

Енді Ұлттық аккредиттеу орталығының мамандары мұндай зертханалардың жабдықтарын және сынақ процесін фото мен видеоға түсіреді.

Қарапайым тілмен айтқанда, тексеру кезінде мамандар зертхананың қажетті жабдықтармен толық қамтылғанына және сынақты өздері жүргізетініне көз жеткізуі тиіс.

Ол үшін әрбір жабдық жеке түсіріледі. Фото мен видеода зауыттық нөмірі, жай-күйі және негізгі сипаттамалары тіркеледі. Бұл тексеру кезінде жабдықты басқа зертханадан уақытша әкелу мүмкіндігін болдырмау үшін қажет.

"Фото және бейнематериалдар бағалаудан кейін туындауы мүмкін даулы жағдайларды болдырмауға да көмектеседі. Олар қандай жабдықтың пайдаланылғанын және сынақтардың қалай жүргізілгенін объективті түрде растауға мүмкіндік береді. Түсірілім аккредиттеу субъектілерінің келісімімен және жасалған шарттар шеңберінде ғана жүзеге асырылады", - деп хабарлады Ұлттық аккредиттеу орталы.

Сонымен қатар бақылау сынақтары видеоға түсіріледі. Осылайша мамандар зертхана қалай жұмыс істейтінін, қандай жабдықтарды қолданатынын және тиісті мамандардың бар-жоғын бақылай алады.

Әзірге бұл тәртіп тестілік режимде іске асырылады. Ол КҚКҚК берумен айналысатын зертханаларға ғана емес, басқа да сынақ зертханаларына қолданылып жатыр. Жаңа схема бойынша 55 зертхана тексеруден өтті.

Болашақта фото мен видео түсірілім міндетті болады. Ол үшін заңнамаға тиісті өзгеріс енгізілмек.

Тағы оқыңыз: Қазақстанда көліктерді техникалық байқау ережелері күшейтілді: жүргізушілер үшін не өзгереді?

Google News арқылы жаңалықтарымызды қадағалаңыз