Қазақстанға көшіп келуге рұқсат алу қиындай түсті: тіл меңгеру қажет

Қазақстанда тұрақты тұруға рұқсат алу талаптары едәуір күшейтілді. Енді шетелдіктер қазақ тілін білу деңгейін бұрынғыдан жоғары сатыда дәлелдеуі тиіс, ал миллионер қалаларға қоныс аудару мүмкіндігі шектеледі.

Ресми мәлімдемелердің әлі жарияланбағанына қарамастан, бұл өзгерістер іс жүзінде қолданыла бастады. 13 сәуірден бастап түрлі елдерден келген қоныс аударушылар өтінім беру кезінде жаппай бас тартылған жауаптарын ала бастаған.

Тіл білу деңгейі: А1-дің орнына В1

Негізгі кедергілердің бірі — қазақ тілін білу деңгейін анықтайтын міндетті тест. Бұған дейін тиісті порталдарда базалық А1 деңгейі көрсетілсе, енді міндетті талап В1 (орта деңгей: негізгі ойды түсіну және таныс тақырыптарда еркін сөйлесу) деңгейіне дейін көтерілген.

«13 ақпаннан бастап автоматтандырылған "цифрлық скоринг" жүйесі енгізілді. Ол барлық шетелдіктердің төлем қабілеттілігі мен сенімділігін тексереді. Алғашқы пункт ретінде дәл осы тіл емтиханы тұр», — деп хабарлады үкіметтегі дереккөздер.

Тағы бір маңызды жаңалық — қоныстану географиясына қатысты. Енді елде тұрақтауға үміткер үкімет айқындаған жеті басым өңірдің бірін таңдауы тиіс:

Ақмола облысы;

Абай облысы;

Шығыс Қазақстан облысы;

Қостанай облысы;

Павлодар облысы;

Солтүстік Қазақстан облысы;

Ұлытау облысы.

Халқының саны 1 миллионнан асатын қалалар — Алматы, Астана және Шымкент бұл тізімге кірмейді. Бұл іс жүзінде жаңадан тұруға ықтиярхат алушылар үшін мегаполистердің жабық екенін білдіреді.

«Цифрлық скоринг» және тілдесу

Тіл білу деңгейінен бөлек, автоматтандырылған жүйе мынадай көрсеткіштерді бағалайды:

Отбасы құрамы және ҚР-да туыстарының болуы;

Білім деңгейі мен жұмыс өтілі;

Мамандықтың ел экономикасы үшін қажеттілігі;

Денсаулық жағдайы.

Қорытынды кезең — жергілікті атқарушы органдардағы міндетті тілдесу. «Скорингтің» барлық сатысынан сәтті өткен үміткер ғана көші-қон қызметіне құжат тапсыруға мүмкіндік беретін хабарлама алады.

Жаңа ережелер ешқандай ерекшеліксіз барлық шетелдік азаматтарға қатысты болады. Ресми қаулы таяу күндері жарияланады деп күтілуде.

Бүгін, 09:22