Қазақстанның халықаралық авиациялық саясаттағы мүмкіндігі кеңейеді заң

Аталған хаттамалар 2016 жылғы 6 қазанда Халықаралық Азаматтық авиация ұйымы Ассамблеясының 39-сессиясында қабылданды. Олар мүше мемлекеттер құрамының едәуір кеңеюін ескере отырып, ИКАО басқару жүйесін жетілдіруге бағытталған.

— Өзгерістерге тоқталсақ, ИКАО кеңесінің құрамын 36-дан 40 мемлекетке дейін ұлғайту ескерілген. Бұл мүше мемлекеттердің неғұрлым әділ және географиялық теңгерімді өкілдігін қамтамасыз етуге мүмкіндік береді. Екіншіден, техникалық сараптаманы күшейту және ИКАО-ның нормашығармашылық қызметінің тиімділігін арттыру мақсатында Аэронавигациялық комиссия құрамын 19-дан 21 мүшеге дейін көбейту көзделеді. Бұл өзгерістердің қажеттілігі ИКАО құрылған сәттен бастап мүше мемлекеттердің саны 52-ден 193 мемлекетке дейін ұлғаюына, ал ұйымның негізгі басқару органдарының сандық құрамы ұзақ уақыт бойы қайта қаралмай, өзгеріссіз қалуына байланысты, — деді сенатор Бибігүл Аққожина.

2022 жылы ИКАО Ассамблеясының 41-ші сессиясында қарар қабылданды, онда мүше мемлекеттер ИКАО органдарын реформалау қажет екенін мойындады және тиісті хаттамаларды жедел ратификациялауға шақырды. Олардың күшіне енуі үшін 128 ратификация қажет. Бүгінгі таңда бұл өзгерістерді 120 мемлекет ратификациялады.

— Қазақстан Республикасы үшін хаттамаларды ресми түрде бекітудің маңызы зор. Бұл еліміздің халықаралық авиациялық саясатты қалыптастыруға неғұрлым белсенді қатысуы үшін мүмкіндіктерді кеңейтуге, сондай-ақ ИКАО органдарының құрамына кандидатурамызды ықтимал ілгерілету үшін алғышарттар жасауға мүмкіндік береді. Аталған заңды қабылдау — Конвенция аясында азаматтық авиацияны халықаралық-құқықтық реттеудің тиімділігін арттыру, халықаралық стандарттар мен ИКАО-ның ұсынылатын практикасын сақтау, сондай-ақ сапалы және сенімді авиациялық қызмет көрсетуді қамтамасыз ету. Сонымен бірге, заңды қабылдау Қазақстан Республикасының қолданыстағы заңнамасына өзгерістер енгізуді талап етпейді, республикалық бюджеттен қосымша қаржылық шығындарға әкеп соқпайды және теріс әлеуметтік-экономикалық, құқықтық салдарлары жоқ, — деді депутат.

Айта кетейік, биыл Қазақстан Көлік министрлігінің Азаматтық авиация комитетінің төрағасы Салтанат Томпиева Халықаралық азаматтық авиация ұйымының (ИКАО) Бас хатшысы Хуан Карлос Салазардың шешімімен ИКАО-ның Ғаламдық елшілер бағдарламасы аясында елші болып тағайындалды.