Қазақстанның саяси партиялары Құрылтай сайлауына толық дайын екенін мәлімдеді

Фото: Ашық дереккөз

Партиялар алдағы сайлау науқанын жаңа Конституцияны іске асырудың маңызды кезеңі деп бағалап, елдің жаңа жоғары заң шығарушы органына өтетін алғашқы сайлауға қатысуға толық дайын екендерін растады.

Мәлімдемелерде сайлау мемлекеттік құрылыстың жаңа конституциялық моделіне көшудің алғашқы практикалық қадамы болатыны, сондай-ақ өкілді демократия мен парламентаризмнің жаңа кезеңін бастайтыны атап өтілді.

«Әділет» партиясы өзін «жаңа Конституцияның партиясы» ретінде қарастыратынын мәлімдеді. Партия өкілдерінің айтуынша, жаңа Ата заң қағидаттарын іс жүзінде жүзеге асыру олардың қызметінің басты бағытына айналады. Сондай-ақ өңірлік желіні қалыптастырудың ұйымдастыру кезеңі аяқталып, халықпен толыққанды жұмысқа, партиялық бастамаларды жүзеге асыруға және жергілікті бөлімшелерді дамытуға көшкені хабарланды.

Әсел Жанәбілова жаңа Конституция бойынша сайлау заңнамасындағы жаңашылдықтарды түсіндірді

«Ақ жол» демократиялық партиясы Құрылтайдың құрылуы парламентаризмді одан әрі дамытуға жаңа мүмкіндіктер ашатынын мәлімдеді. Партияның пікірінше, алдағы сайлау саяси реформалардың заңды жалғасы әрі жаңа Конституция ережелерін іс жүзінде жүзеге асырудың көрінісі болады.

«Respublica» партиясы сайлауға дайындықты алдын ала бастағанын хабарлады. 4 шілдеде өтетін кезектен тыс съезде сайлауалды бағдарламасы, кандидаттардың партиялық тізімі және сайлау науқанының негізгі міндеттері бекітіледі. Сонымен қатар партия қоғам үшін лайықты жұмыс, қолжетімді тұрғын үй, сапалы білім мен медицина, сондай-ақ қауіпсіздік басты сұраныс болып қала беретінін атап өтті.

Қазақстанның Халық партиясы да сайлауға толық дайын екенін мәлімдеп, бұл науқанды «кәдімгі сайлау емес, Қазақстанның жаңа саяси архитектурасын іске асырудағы алғашқы практикалық қадам» деп бағалады. Партия Құрылтайдың құрамын жасақтауға белсенді қатысатынын айтып, азаматтарды 23 тамызда дауыс беруге шақырды.

Құрылтай депутаттарының сайлауына дайындық аясында 71 мыңнан астам сайлау комиссиясының мүшесі оқытудан өтеді

Жалпыұлттық социал-демократиялық партия (ЖСДП) сайлау науқанының адал әрі әділ өтуі азаматтардың болашақ Құрылтайға деген сенімінің басты кепілі болатынын мәлімдеді. Сондай-ақ партия сайлаудың ашық, әділ және шынайы саяси бәсекенің үлгісіне айналуына ықпал ететінін жеткізді.

«Ауыл» партиясы сайлау үдерісіне белсенді қатысуға дайын екенін мәлімдеді. Жақын уақытта партия съезін өткізіп, сайлауалды бағдарламасын бекітуді және сайлау науқанына қатысуды жалғастыруды жоспарлап отыр. Партия өкілдері алдағы сайлау елдің тұрақты дамуына, қоғамдық келісім мен азаматтық жауапкершіліктің нығаюына ықпал ететініне сенім білдірді.

«Байтақ» партиясы жаңа Конституция Қазақстанның саяси жүйесін едәуір жаңғыртқанын, ал Құрылтай сайлауы жаңартылған парламенттік модель жұмысының бастамасы болатынын атап өтті. Партия елге азаматтардың мүддесін қорғайтын білікті сарапшылар мен нақты іс атқаратын адамдар қажет екенін айтып, алдағы сайлау науқанына дайын екенін растады.

Құрылтай сайлауына дайындық басталды

Осылайша, Қазақстанның саяси партиялары сайлау науқанының басталуына толық дайын екендерін мәлімдеп, 2026 жылғы 23 тамызда өтетін Құрылтайдың алғашқы құрамын жасақтауға белсенді қатысуға ниетті екенін білдірді.

Айта кетейік, 1 шілдеден бастап елімізде Жаңа Конституция күшіне енді. Соған байланысты Мемлекет басшысы Қасым-Жомарт Тоқаев Қазақстан халқына үндеу жасады.