Қазақстанның TopIQ электронды оқулық платформасы Әзербайжан мектептеріне енгізіледі

Бүгін Әзербайжан президентінің Қазақстанға ресми сапары аясында «Алматыкітап» баспасы ТОП АЙКЮ атты Қазақстандағы алғашқы электронды оқулықтар платформасын Әзербайжан мектептерінде енгізу бойынша әзербайжандық компаниямен меморандумға қол қойды.

Бұған сәйкес, енді бауырлас елдің білім алушылары отандық платформа арқылы мектеп бағдарламасын интерактивті форматта жеңіл түрде меңгермек. Цифрлық мүмкіндіктерді молынан пайдаланып, анимациялық сұрақтар мен қызықты контентті қолданбақ.

«Алматыкітап» 25 жылдан астам уақыт бойы ел тұрғындарын заман талабына сай сапалы оқулықтармен қамтамасыз етіп келе жатқан отандық баспалардың бірі. Осы уақыт аралығында кітап үйі көркем-әдеби және ғылыми-танымдық бағыттағы балаларға арналған 3 мыңнан астам кітап түрінің 40 миллион данасын басып шығарған. Ал соңғы 10 жылдықта баспа цифрлық оқулықтардың құрылымына ден қойып, TOP IQ электронды білім платформасын іске қосты.

Гүлнұр Құдайберген, «Алматыкітап» баспасының Астана қаласы бойынша вице-президенті:

"Бүгінгі таңда цифрлық оқулықтарға жасанды интеллект енгізілген. Жасанды интеллект "Қамқор", сұрақтарға жауап береді және күрделі тақырыптарды оқушыларға қарапайым, жеңіл тілмен таныстырып береді. Қарапайым сөзбен функцияны т.б. күрделі тақырыптарды түсіндіріп береді. Бірге шығарады".

Платформада мектеп пен мектепке дейінгі ұйымдарға арналған 300-ге жуық электронды оқулық енгізілген. Оқу бағдарламасын интерактивті форматта жеңіл түрде меңгеруге мүмкіндік беретін платформа енді әзірбайжандық оқушыларға да қолжетімді болмақ.

Орхан Абасов, әзербайжандық компания директоры:

- "Екі елдің баспа үйі арасындағы бұл келісім 5 жылға жалғасады. Негізінен, білім саласына арналған электронды контент және электронды платформа бағыттары бойынша жүзеге асады. Нәтижесінде Қазақстан мен Әзербайжанға ортақ білім беру саласындағы жаңа жүйе құрылады деген үміттемін".

Top IQ платформасы осыдан үш жыл бұрын 150 елдің арасында үздік үштікке ілініп, халықаралық қолдауға да кенелді. Енді Әзербайжан мемлекетімен жүзеге асқан уағдаластық екі ел арасындағы цифрлық білім беру саласындағы ынтымақтастықты жаңа деңгейге шығарары сөзсіз.

Назым Қайрат, Бағдат Қайыркен