Қазақы тазы тұқымына арналған аңшылық сынақтар өтті

Бүгін «Қазақы тазы» тұқымына арналған аңшылық сынақтар өтті. Іс-шараны «Қазақстан кинологтар одағы» республикалық қоғамдық бірлестігі ұйымдастырды, деп жазады Egemen.kz.

Көрмелер қатар далалық сынақтар селекциялық жұмыстың маңызды бөлігі болып табылады, себебі олар иттің аңшылық қабілеттерін бағалауға мүмкіндік береді. Тазының аңшылық шеберлігі — ата-бабаларымыз үшін басты сұрыптау өлшемі болғаны мәлім.

Бүгінгі сынақтар барысында иттердің жылдамдығы, маневрлік қабілеті, төзімділігі, ақылы мен қуу шеберлігі бағаланды. Нәтижелер иттердің жоғары дайындық деңгейін растады.

Іс-шара барлық қауіпсіздік талаптары мен аңшылық ережелеріне сай өтті. Сынақтарға еліміздің әр өңірінен 20 қазақы тазы қатысты. Төрешілік міндетін тәжірибелі мамандар, сарапшылар мен тазы баптаушылар атқарды. Олар Алматы, Ақтөбе, Абай, Павлодар, Ақмола облыстарынан, сондай-ақ Алматы және Астана қалаларынан келді.

Айта кету керек, бұған дейін, 7 қараша күні, еліміздің әр түрлі аймағынан келген мамандардың қатысуымен төрешілерге арналған семинар өтті. Бұл іс-шара кинология саласындағы кәсіби қауымдастықты біріктіру және аңшылық сынақтардың бірыңғай стандарттарын қалыптастыру жолындағы маңызды қадам болды.

Бұл бастама жұмыс сапасын бағалаудың бірыңғай жүйесін қалыптастыру және ұлттық тұқымның аңшылық әлеуетін сақтау ісіндегі маңызды кезеңге айналды.

Қазақстан кинологтар одағы алдағы уақытта осындай іс-шараларды елдің басқа өңірлерінде де өткізуді жоспарлап отыр. Бұл қадам қатысушылар географиясын кеңейтуге, иелер мен мамандарды көбірек тартуға, сондай-ақ қазақы тазының жұмыс сапасын бағалау мен дамытуға арналған бірыңғай тәжірибелік базаны қалыптастыруға мүмкіндік береді. Өңірлердегі тұрақты сынақтар жүйелі селекциялық жұмыстың және аңшылық дәстүрлерді сақтаудың маңызды құралы болмақ.