ҚазАвтоЖол ақылды камераларды іске қосты: Ол не тіркейді?

«ҚазАвтоЖол» ұлттық компаниясы жол саласын цифрландыру аясында енгізіп жатқан жасанды интеллект элементтері бар жаңа бейнеаналитика жүйесін  іске қосты. 

Бұл заманауи камералар республикалық жолдардағы жағдайды тәулік бойы бақылап, орын алуы мүмкін деген оқиғаларға жедел әрекет етуге көмектеседі.

Жүйенің басты ерекшелігі — оның автономды жұмыс істеуі. Құрылғылар әдеттегі инфрақұрылымы жоқ шалғай жол учаскелерінде де қызмет ете алады. Ол үшін камералар күн панельдерімен және жел генераторларымен жабдықталған. Олар күн мен желден қуат алып, жол жағдайын нақты уақыт режимінде бақылайды және деректерді тиісті қызметтерге жеткізеді.

Жасанды интеллект жолдағы мынадай қауіпті жағдайларды анықтап, тіркей алады:

Жүру бөлігінде жаяу жүргіншінің немесе жануардың пайда болуы;

Қарсы бағытқа шығу және артқа жүру;

Тұрақ ережесін бұзу;

Көліктің мемлекеттік нөмірін, маркасын және түсін тану.

Жобаның негізгі мақсаты — жол қозғалысы қауіпсіздігін арттыру. Қауіпті жағдай неғұрлым ерте анықталса, жол қызметтері де соғұрлым тез ақпарат алып, тиісті шара қолдана алады.

Қазіргі уақытта жаңа жүйені енгізу жұмыстары мынадай учаскелерде қолға алынды:

«Алматы – Қонаев» ақылы учаскесі: Пилоттық жоба қазірдің өзінде сынақтан өтіп жатыр. Мұнда жабдықтардың және автономды инфрақұрылымның жұмысы тексерілуде.

«Астана – Теміртау» учаскесі (ұзындығы 134 шақырым): Бағыт бойында тіректер орнатылып, камералар, күн панельдері, жел генераторлары және дерек беру жабдықтарын монтаждауға дайындық жүргізіліп жатыр.

«Астана – Ұлттық парк / Щучинск» учаскесі: Дайындық жұмыстары басталып, байланыс инфрақұрылымы мен жабдықтарды орналастыруға арналған негіздер әзірленіп жатыр.

Алдағы уақытта бұл құрылғылар автомобиль жолдарын бақылаудың бірыңғай интеллектуалды жүйесінің бір бөлігіне айналады. Бұл республикалық жолдардағы сапар қауіпсіздігін күшейтуге және жол қызметтерінің әрекет ету жылдамдығын арттыруға мүмкіндік береді.

Бүгін, 10:41