Қазмұнайгаз басшысы ​Қашаған мен Қарашығанақ бойынша маңызды келіссөз жүргізді

«ҚазМұнайГаз» ҰК АҚ (ҚМГ) Басқарма төрағасы Асхат Хасенов Баку қаласында «Eni S.p.A» компаниясының жаһандық табиғи ресурстарды барлау және өндіру жөніндегі директоры Лука Виньятимен кездесті. 

Тараптар бірлескен ірі мұнай-газ жобалары мен жасыл энергетика саласындағы ынтымақтастықты пысықтады.

Кездесу барысында екі компанияның Солтүстік Каспий және Қарашығанақ жобалары аясындағы өзара іс-қимылының маңызды тұстары сөз болды:

Қашаған жобасы: ҚМГ басшысы қазіргі уақытта серіктестер Қашаған кен орнындағы мұнай өндіру көлемін одан әрі ұлғайту жобаларын уақтылы жүзеге асыруға ерекше мән беруі тиістігін баса айтты.

Қарашығанақ жобасы: Қарашығанақты кеңейту жобасын жүзеге асырудың стратегиялық маңызы талқыланды. Атап айтқанда, бұл жоба қабат қысымын ұстап тұру және қабаттардың мұнай беру көлемін арттыру мақсатында газды кері айдауға арналған 6-компрессорды іске қосуды көздейді.

Кездесуде Маңғыстау облысында салынып жатқан, жалпы қуаты 247 МВт болатын гибридті электр станциясының құрылысы егжей-тегжейлі қаралды. Жоба бірнеше бағыт бойынша іске асырылуда:

1. Күн электр станциясы (КЭС) — 50 МВт Жаңаөзен қаласында 2025 жылы іске қосылған болатын. Нақты өндіріс көрсеткіштері:

Былтыр: КЭС 11,6 млн кВт•сағ электр энергиясын өндірді;

Биыл (қаңтар-мамыр): Өндіріс көлемі айтарлықтай артып, 31,2 млн кВт•сағ құрады;

Болжам: Станция толық қуатында жылына шамамен 86 млн кВт•сағ таза электр энергиясын беретін болады.

2. Газ электр станциясы — 120 МВт Қазіргі уақытта бұл нысан бойынша құрылыс-монтаждау және іске қосу-баптау жұмыстары белсенді жүріп жатыр. Жобаны осы жылдың соңына дейін пайдалануға беру жоспарланған.

3. Жел электр станциясы (ЖЭС) — 77 МВт Қазіргі уақытта бұл станцияның құрылысына қатысты қажетті дайындық жұмыстары жүргізілуде.

ҚМГ-дан атап өткендей, бұл энергетикалық нысандарды іске асыру өңірдің өндірістік қуаттарын тұрақты және экологиялық таза электр қуатымен қамтамасыз етуге мүмкіндік береді.

Бүгін, 10:54