ҚазҰУ да Егемендік декларациясының 35 жылдығы аталып өтті

Әл-Фараби атындағы ҚазҰУ-да Республика күні мен еліміздің егемендігі туралы декларацияның қабылданғанына 35 жыл толуына арналған «Мемлекеттік егемендік туралы декларация және қазіргі Қазақстан: сын-қатерлер, жетістіктер, тұрақты дамудың ауқымы» атты халықаралық ғылыми-тәжірибелік конференция өтті, деп хабарлайды Egemen.kz.

Конференцияны Әл-Фараби атындағы Қазақ ұлттық университетінің басқарма төрағасы-ректор Жансейіт Түймебаев ашып, қатысушыларды Республика күнімен құттықтады. Ректор ұлттық бірліктің символына айналған бұл күнді мерекелеу мақтаныш пен болашаққа деген сеніммен  атап өтілетініне тоқталды. Айтуынша, академиктер Сұлтан Сартаев пен Салық Зиманов сынды ұлт зиялыларының еңбектерін ерекше атап өтіп, олардың есімдері еліміздің конституционализм тарихында мәңгілікке жазылып қалды.

– Қазіргі таңда Қазақстан цифрлық технологиялар мен жасанды интеллект дәуірінде жаңа белеске қадам басты. Президент Қасым-Жомарт Тоқаевтың басшылығымен еліміз «Заң және тәртіп» қағидаттарына негізделген жаңғыру стратегиясын табысты іске асырып жатыр. Бұл бағыт әділеттілік, ашықтық және жауапкершілік құндылықтарын тұрақты дамудың басты ұстанымына айналдырды», – деді ректор.

Іс-шара барысында Парламент Мәжілісінің депутаты Ирина Смирнова, заң ғылымының докторы, профессор Игорь Рогов, Алматы қаласы прокурорының орынбасары Дамир Қатаев және өзге де қатысушылар  құттықтау сөз сөйлеп, жиын пленарлық отырыстарда жалғасты.

Еліміздің көрнекті ғалымдары мен сарапшылары Қазақстанның егемендігі мен мемлекеттілігінің қалыптасуы, саяси жүйенің дамуы, әлеуметтік-экономикалық және құқықтық жаңғыру үдерістері жөнінде мазмұнды баяндама жасады.

Конференцияның секциялық отырыстарында «Егемен мемлекет ретіндегі Қазақстанның конституциялық-құқықтық дамуы», «Мемлекеттік егемендік – құндылық ретінде: сын-қатерлер мен болашаққа пәнаралық көзқарас», «Экономикалық саясат және тұрақты дамудың конституциялық қағидаттары» және тағы басқа тақырыптар кеңінен талқыланды.

Алқалы жиынға еліміздің және шетелдің беделді ғалымдары, мемлекет және қоғам қайраткерлері, университет басшылығы, белгілі ғалымдар, профессорлар, оқытушылар мен студенттер қатысты.

АЛМАТЫ