​Атырауда ТЖМ нің 30 жылдығы мен Құтқарушылар күні аталып өтті

Атырауда Қазақстан Республикасының Төтенше жағдайлар министрлігінің 30 жылдығы мен Құтқарушылар күніне арналған салтанатты жиын өтті. Іс-шараға облыс әкімі Серік Шәпкенов, сала ардагерлері және азаматтық қорғаныс қызметкерлері қатысты.

Жиын барысында 2024 жылдың көктемінде Құлсарыдағы су тасқыны кезінде ерлікпен қаза тапқан құтқарушы Бейбарыс Рахым бір минут үнсіздікпен еске алынды. Оның есімі — батырлық пен қызметке адалдықтың символы. Бұл оқиға құтқарушылардың жұмысы кейде өз өмірін қатерге тігуге дейін баратынын, мыңдаған адамның қауіпсіздігі солардың жанкешті еңбегіне байланысты екенін көрсетеді.

Облыс әкімі құтқарушыларды кәсіби мерекемен құттықтап, олардың қоғамдағы рөліне ерекше тоқталды:  
«Бұрын өмір мен өлімнің арасында дәрігерлер тұр дейтінбіз, бүгінде бұл қатарға құтқарушылар да қосылды. Олар су тасқыны, өрт, табиғи апаттар кезінде үй көрместен, адам өмірін сақтап қалуға тырысады. Президент Қасым-Жомарт Тоқаев айтқандай, біз жүрек қалауымен еңбек ететін жандарға жағдай жасауымыз керек», — деді әкім.

Салтанатты жиында қызметінде ерекшеленген мамандарға мемлекеттік және ведомстволық марапаттар табысталды. Кейбір қызметкерлер мерзімінен бұрын арнайы атақтарға ие болды.

Қазіргі таңда Атырау облысында 17 өрт сөндіру бөлімі, 900-ден астам қызметкер және 250-ге жуық техника жұмыс істейді. Бұл — өңірдің қауіпсіздігін қамтамасыз етуде маңызды ресурс.

Бүгін, 16:51