Атырауда музыка майталманы Орақ Жауырұлының 80 жылдығы аталып өтті

Махамбет атындағы академиялық қазақ драма театрында «Құрмет» орденінің кавалері, Атырау облысының «Құрметті азаматы» Орақ Жауырұлының 80 жылдық мерейтойына арналған «Өнер – өмірдің өнегелі өрісі» атты салтанатты шығармашылық кеш өтті.

Дина Нұрпейісова атындағы Академиялық қазақ халық аспаптар оркестрінің ұйымдастыруымен өткен кештің шымылдығын Қазақстанның еңбек сіңірген қайраткері Карима Сахарбаева жүргізіп, Орақ Жауырұлының өнегеге толы өмір жолы мен өнердегі дара қолтаңбасын кеңінен баяндады.

Кеш көрермендеріне Орақ Жауырұлының шығармашылық мұрасы мен өмірлік ұстанымын айшықтайтын «Өнер – өмірдің өнегелі өрісі» атты жаңа кітабы таныстырылды. Кеш барысында өнер қайраткеріне «Құрметті профессор» атағы табыс етілді. Сондай-ақ, «Алып қыран» орденімен марапатталып, ҚР Мәдениет және ақпарат министрлігінің, Атырау облысы әкімінің құттықтау хаты табысталды. 

Салтанатты шараға еліміздің мәдениет майталмандары арнайы қатысып, мерейтой иесіне деген ыстық ықыластарын білдірді. Атап айтқанда, Қазақстанның «Халық әртісі» Айтқали Жайымов пен Қазақстанның еңбек сіңірген қайраткері Рахат Мадреев, Еркін Шүкіманов, Нұржан Жанпейіс, Еркін Нұрымбетов және Нұрлан Бекенов кештің қадірлі қонағы болды. Сонымен қатар, Еркеғали Рахмадиев атындағы Мемлекеттік академиялық филармониясының әртісі, халықаралық байқаулардың лауреаты Нұрсат Алмас пен жергілікті өнер саңлақтары сахнаның сәнін келтірді.

Орақ Жауырұлы 1945 жылы Томарлы ауылында дүниеге келген. Гурьев музыкалық училищесін және Құрманғазы атындағы консерваторияда оқығаннан кейін туған қаласына оралып, көп жыл бойы Дина Нұрпейісова атындағы оркестрде және музыкалық училищеде жұмыс істеді. Кейін Құрманғазы атындағы музыка мектебінің директоры болып, "Нарын" және Д.Нұрпейісова атындағы оркестрлерге жетекшілік етіп, қазақ халық музыкасын Қазақстанда және одан тыс жерлерде насихаттады.

Жергілікті композиторларды қолдаумен қатар, ол өзінің де күйлерін шығарды. Оның ішінде басынан өткерген ауыр қайғыны жеңуіне көмектесіп, күш-жігерін жинауға арқау болды.

Алма Қалусариева

Видео Атырау облысы мәдениет басқармасынан

Бүгін, 14:04