Қоғамдағы резонанс: Мүфтият уағызшы Құрбанәлі Ахметке қатысты мәлімдеме жасады

Еске сала кетейік, журналист Жанар Байсеміздің «Байсеміз LIVE» жобасындағы сұқбатынан кейін әлеуметтік желіде үлкен резонанс тудырған «псевдоимам» Құрбанәлі Ахметке қатысты Қазақстан мұсылмандары діни басқармасы түсініктеме берді.  

— Құрбанәлі Ахмет Қазақстан мұсылмандары діни басқармасының құрылымында қызмет етпейді, Діни басқармамен ешқандай қызметтік немесе ресми байланысы жоқ. Осыған байланысты оның тарапынан айтылған пікірлер, жеке көзқарастар мен мәлімдемелер ҚМДБ-ның ресми ұстанымы болып табылмайтындығын хабарлаймыз. Қазақстан мұсылмандары діни басқармасы дінге қатысты мәселелерде тек ресми ақпарат көздеріне сүйенуге шақырады. Қоғам арасында түрлі түсінбеушілік пен жалған ақпараттың таралуына жол бермеу — баршамызға ортақ жауапкершілік, — делінген мүфтияттың жауабында.

ҚМДБ сондай-ақ еліміздегі діни тұрақтылықты сақтау, қоғам бірлігін нығайту және дәстүрлі құндылықтарды насихаттау бағытындағы жұмыстарын жүйелі түрде жалғастыра беретінін айтқан.

Бұған дейін Мәжіліс депутаты Ермұрат Бапи теріс діни ағымдарға тосқауыл қою мәселесін көтеріп, ҚР Бас прокуроры Берік Асыловтың атына сауал жолдағанын еске саламыз.

— Бүгін мен бір жағынан азаматтардың жеке мәселесі сияқты көрінсе де, қоғамдық тұрақтылық тұғырын теңселтіп, ұлттық мәдени бірегейлік пен еліміздің ақпараттық қауіпсіздігіне қауіп төндірер қатерлер төңірегіндегі тақырыпты қозғамақпын. Сөз нәзік діни дүниені жалбағай жамылып, елдің интернет әлемінде халықтың санасына манипуляция жасайтын «псевдодіни авторитеттер» турасында болмақ. Турасын қаймықпай айтқанда, дүмше догманы тықпалаған бұл қарабайыр діндарлар біздің ұлттық ұстанымды ірітіп, мемлекетіміз бен қоғамның тағанын теңселтуде, — деген еді Е. Бапи Мәжілісінің жалпы отырысында.

Осы орайда депутат ұлттық мәселені популизм жолында құрбан етуге құштар журналист әріптестер мен масс-медианың басқа да өкілдерін кәсіби, адами және азаматтық ұстанымға берік болуға шақырған болатын.

Ал әлеуметтік желіде резонанс тудырған сұхбатта Құрбанәлі Ахмет екінші әйелін жас шәкіртіне беріп, үйлендіргенін айтқан болатын. 

Артынша өзін «имам» ретінде таныстырған Құрбанәлі Ахмет әкімшілік құқық бұзушылық туралы кодекстің 490-бабы бойынша жауапкершілікке тартылып, айыппұл салынғаны мәлім болды. Оның мәлімдемелері заңға қайшы деп танылды.