Қолайлы әрі қауіпсіз цифрлық орта

Биыл елде Ұлттық суперкомпьютерлік орталық – Alem.cloud іске қосылды. Оның мүмкіндіктері мемлекеттік органдар, ғылыми институттар, жоғары оқу орындары, бизнес және стартаптар үшін қолжетімді. 

Суперкомпьютер мемлекеттік қызметте үлкен тілдік модельдерді оқыту, жасанды интеллект агенттерін әзірлеу, деректерді талдау, мазмұнды құру және модельдеу міндеттерін тестілеу мақсатында қолданылады. Cондай-ақ ел үкіметі бірыңғай цифрлық жүйені реттейтін бірқатар шешім қабылдады. Бұған дейін Мемлекет басшысының тапсырмасымен Премьер-министр жетекшілік ететін Цифрлық штаб құрылды.

200-ден астам ақпараттық жүйені интеграциялау жоспары бекітілді. Бұл еңбек шығындарын қысқартуға, қайталануды жоюға және мемлекеттік органдар жұмысының тиімділігін арттыруға мүмкіндік береді. Бұдан бөлек, деректер қауіпсіздігін күшейту мақсатында мемлекеттік органдар Aitu мессенджеріне көшіп жатыр. Азаматтар eGov, eOtinish, Aitu сынды цифрлық қызметтерді ұялы байланыстың нөлдік теңгерімінде де тегін пайдалана алады.