Алматы 2035: тұрақты әрі қауіпсіз болашақ

Ғалымдар, жергілікті басқару органы мен бизнес өкілдері Алматының алдағы 10 жылдағы тұрақты дамуын кешенді түрде қарастырмақ.

Зерттеулер цифрлық технологиялар негізінде жүргізіледі. Бүгін өткен форсайт-сессияда мегаполистегі таза ауа мен сейсмикалық қауіпсіздікке жүйелі талдау жасалып, шешу жолдары қарастырылды.

Форсайт-сессияға ғалымдармен қатар, қаладағы қоғамдық тамақтандыру бизнесінің өкілдері де шақырылды. Себебі, шаһар ауасының ластануына автокөліктер мен жылу электр орталықтарынан бөлек, мейрамхана, дәмханалардың да «үлесі» бар. Ауадағы адам денсаулығына қауіпті қалдықтардың 15 пайызы осы тамақтандыру өндірісіне тиесілі екен. 

Қуантар Әлиханов, ҚР Президентінің жанындағы ҰҒА пәнаралық ғылым орталығының директоры:

- Бұл тек қана жиналыс отырыс қана емес, осы форсайт-сессиясының нәтижесінде арнайы Алматы қаласының болашақ технологиялық картасы әзірленетін болады. Оның ішінде экология бағытында ауаның сапасын жүйелі түрде мониторинг жасайтын технологиялар енгізілетін болады.

«Басқосуда сейсмикалық қауіпсіздікті арттыруға бағытталған «цифрлық егіздер» технологиясы таныстырылды. Ғимараттың виртуалды көшірмесіне жүктеме беру арқылы нәтижені болжауға болады», - дейді ғалымдар. Алматыны дамытуға бағытталған ғылыми жобалар әкімдік тарапынан қаржыландырылады.

Азиз Қажденбек, қалалық Жастар саясаты басқармасының басшысы:

- Біздің басқарма ғылым саласының үйлестірушісі болып табылады. Ендігі жылға әкімшілік тарапынан бюджет қарастырып жатырмыз. Әкімдік ғылыми зерттеулерге қала деңгейінде жүзеге асырылатын мысалы, ауаны тазарту, абаттандыру жұмыстарына зерттеулерді қала деңгейінде енгізу үшін қаржыландыруға мүмкіндік болады.

Президент жанындағы Ұлттық ғылым академиясы бұған дейін Қазақстан бойынша өңірлерде 70-тен аса форсайт сессия өткізіп, 62 ғылыми-техникалық тапсырма әзірленді.

Авторлары: Гүлжан Көленқызы, Мұхит Құдықбаев