Қонаевта ММА жаттықтырушысы жасөспірімдерге тиісті деген күдікке ілінді

АСТАНА, 19 мамыр – Sputnik. Қонаевта ММА жаттықтырушысы өзі жаттықтырып жүрген жасөспірімдерге тиісті деген күдікке ілінді. Тергеу жүріп жатыр, деп хабарлайды Sputnik Қазақстан.

Жәбір көрдім деген жасөспірімдер әлеуметтік желіде жазба жариялады.

"2024 жылдың қаңтар айынан бастап мен ММА спорт секциясына қатыса бастадым. 2-3 айдан кейін маған жаттықтырушы тиісе бастады. Салмақ қуалау кезінде ол ингаляторы бар маска кигізді. Ингаляторды не затпен толтырғанын білмеймін, өйткені көрмедім. Масканы ұйықтап кеткенімше шешпеді. Мен оянғанда есімді жия алмадым, бетіме су шашты. Басым айналып, құсқым келді. Аузма шөптің бе, бір нәрсенің дәмі келді", - дейді жәбір көрдім деген жасөспірімнің бірі бейнежазбада.

Содан бері үнемі басым айналып, құсқым келе береді, дейді ол.

"Бір күні жаттықтырушы "үйіңе жеткізіп саламын" деп мені көлігіне отырғызып алып, есігін құлыптап тастады. Сөйтіп мені аймалап сүйе бастады. Жаттықтырушы мұндай бейәдеп қылығын 2024 жылдан 2025 жылдың қыркүйегіне дейін жалғастыра берді. Жағдай ушығып бара жатқандықтан, мен жаттығуға бармай қалып қоятын болдым. Ол менің үйіме келіп, өзі алып кететінді шығарды. Ал ата-аналарыма "қыздың болашағы зор, бұл спортты тастауға болмайды" деп айтады", - дейді жасөспірім қыз.

Жаттықтырушы зорламақ болды деген екінші жасөспірім де бейнежазба жариялады. Ол да салмақ қуалаймын деп белгісіз затты тұтынғанын айтады.

"Не затты қолданғанын білмеймін, бірақ содан кейін басым айналып, құсқым келді. Жаттықтырушы салмақ қуалау үшін керек зат деп түсіндірді. Тіпті құсып, аяғым жансызданған да сәттер болды. Біз лагерьге барған кезде, түннің бір уағында ол бөлмемізге кіріп, біздің төсегімізге жататын. Жаттығуда адам аз болғанда менің денеме барынша қол жүгіртіп бағатын. Әйелдер киім шешетін бөлмесінде жалғыз қалғанымда ол кіріп келіп, мені қабырғаға тақап алып, сүймек болды. Мен "тиісспеңіз" деп айқайладым", - дейді екінші жасөспірім.

Алматы облыстық полиция департаменті ММА жаттықтырушысына қатысты қылмыстық іс қозғалғанын айтады.

"47 жастағы жергілікті тұрғын ұсталып, тергеу изоляторына қамалды. Қылмыстық іс шеңберінде тергеу әрекеттері жүріп жатыр. Тергеу аяқталғаннан кейін қылмыстық іс сотқа жіберіледі", - дейді облыстық полиция департаментінде.