Қос бағытты қамтыған Phygytal спорт

«Келер жылы Қазақстанда өтетін «Болашақ ойындарының» бағдарламасына хоккей енуі мүмкін. Қазір әлемде бұл спортқа деген қызығушылық басым».

Халықаралық фиджитал қауымдастығының жетекшісі Нис Хат арнамызға берген сұхбатында осылай деді. Жаһандық құрылым жастардың киберспортқа тәуелділік мәселесін оңтайлы жолмен шешуді бастап кетті. Осы бағытта біздің елмен бірлесіп, бірқатар жаңашыл бастама қолға алынды. 

Дүниежүзілік фиджитал ойындары – виртуалды және шынайы спорттық бәсекелерді қамтиды. Екеуінің заманауи қосындысы іспеттес. Яғни, қатысушылар тек кибер кеңістікте ғана емес, арнайы алаңда бақ сынайды. Жалпы бағдарламаға 11 түрлі спорт енген. Солардың ішінде футбол, баскетбол, қала берді нағыз білек күші сыналатын жекпе-жектер де бар.

Кейінгі бір апта бойы Абу Дабиге әлемдік фиджитал кеңістігінің айрықша назары ауды. Әмірліктер астанасында екінші «Болашақ ойындары» өткізіліп, мыңдаған долларлық жүлде қоры сарапқа салынды. Жер-жерден жиналған командалар диджитал және физикалық форматта бақ сынады. «Фиджитал» сөзінің мәні де осында. Қос бағытты қатар қамтуды көздейді.

Нис Хат, «Phygytal International» ұйымының бас директоры:

- Бейнеойындарға қызығатын жас ұрпақ шынайы өмірде белсенді болғанын қалаймыз. Себебі дәстүрлі спорт қай кезде де пайдалы. Жарысқа кәсіби спортшылардың да қызығушылығы ауа бастады. Футболдағы мансабын аяқтаған бірнеше ойыншы фиджитал бәсекелерде өнер көрсетіп жатыр. Демек біздің бастама жастар және ересектерді ынталандыруда. 

Дүниежүзілік дода қазақстандық командалар үшін олжалы болды. Отандастарымыз негізінен футбол және баскетбол сынында өнер көрсетті. Бірі плей-офф кезеңіне дейін жетсе, екіншісі жартылай финалда тоқтады. Десе де елге қомақты жүлде қанжығалап, қайтатын болды.

Әсет Аменкелдинов, баскетболшы, «Games of the Future» жүлдегері:

- Біз бүгін үшінші орынға ойнадық. Сербиялық команданы жеңдік. Кәсіби түрде «Астана» баскетбол командасында ойнаймын. Қазан және желтоқсан айлары аралығында осы жарысқа қарқынды дайындалдық.

Жаңаша формат қалың көрерменнің көңілінен шықты. Киберспорт өкілдері фиджитал ойындарға жоғары баға берді. Енді олар келер жылы қазақ жерінде өтетін жарысқа дайындалады. Ол кезде бағдарламаға хоккей қосылып, бәсекелестік тағы қыза түсуі мүмкін. Әрі қатысушы командалар саны артады деген болжам бар.

Әлібек Хасенов Қазақстанда, «Болашақ ойындарын» ұйымдастыру және өткізу дирекциясының басшысы:

- Белгілі бір салада өз елін жоғары деңгейде танытқысы келетін азаматтар үшін бұл үлкен мүмкіндік. Арнайы бағдарламасы икемді етіп жасалған. Өздеріңізге белгілі, Қазақстан 2026 жылғы «Болашақ» ойындарын өткізеді. Сол жарысты ұйымдастыру дирекциясы Абу Дабиге арнайы келіп, Әмірліктегі әріптестеріміздің тәжірибесімен таныстық.

Қазір ұйымдастырушылар мұз үстіндегі ойынның компьютерлік нұсқасын жетілдіріп жатыр. Жалпы жүлде қорына келсек, биыл оның мөлшері 5 млн долларға жетіп жығылды. Технологиялық компаниялар бұл соманы одан әрі көбейтуге бейіл.

Нис Хат, «Phygytal International» ұйымының бас директоры:

- Хоккейді фиджитал спорт бағдарламасына енгізуді қарастырып жатырмыз. Ол әлемде өте танымал. Өз тарапымыздан бұл ойын нұсқасын жан-жақты сынауды бастадық. Қазақстандағы «Games of the Future» ойындарында оны көргіміз келеді.

Дерекке сай, осы күні диджитал ойындар дәстүрлі спорт түрлері секілді ауқымды аудитория жинайды. Солардың ішінде жастардың қарасы қалың. Негізгі мәселе – заманауи үрдістің тәуелділікке алып бармауын бақылау. Осы мақсатта халықаралық қауымдастық «Болашақ ойындарын» ойлап тауып, бірегей бағдарламасын әзірледі. Тәжірибе әлемдік сарапшылар тарапынан оң бағаланып отыр.

Авторы: Рауан Мыңбай