Қостанай облысында жедел жәрдем станциясына 50 автокөлік берілді

Қостанай облыстық жедел медициналық жәрдем станциясына жаңадан 50 санитарлық автокөлік тапсырылды. Жергілікті автозауыттан шыққан көліктер заманауи медициналық құралдармен жабдықталған. Жедел-жәрдем көліктерінің кілтін Денсаулық сақтау министрі Ақмарал Әлназарова мен облыс әкімі Құмар Ақсақалов табыс етті. 

Қостанай облыстық жедел-жәрдем станциясының техника паркі 50 жаңа көлікпен толықты. Денсаулық сақтау министрі Ақмарал Әлназарова өз сөзінде медицина жүйесінің инфрақұрылымын дамытумен қатар қызметкерлердің әлеуметтік мәселелері де ерекше назарда екендігін атап өтті.

Ақмарал Әлназарова, ҚР Денсаулық сақтау министрі:

- Биылғы жылы шілде айында Президент тарапынан осы құқық жағынан біздің мамандарды қорғау мәселесіне қылмыстық кодекстерге өзгерістерді еңгізу тапсырылды. Осыған байланысты тиісті заң нормалары Мәжіліске еңгізілуде.

Мемлекет басшысының тапсырмасымен іске асырылып жатқан ұлттық жоба аясында елімізде 600-ден астам жаңа медцининалық нысан іске қосылды. 

Құмар Ақсақалов, облыс әкімі:

- Оның ішінде облысымызда да ауылдық жерлерде үлкен, көп медициналық нысан салынды. 28-і бітіп, осы жылдың аяғына дейін тағы 4-і толығымен бітіп қалады.

Жергілікті автозауытта жасалған жедел-жәрдем көліктерінің сапасына, жабдықталуына мамандар жоғары баға беріп отыр. 

Олег Мелешенко, Облыстық жедел медициналық жәрдем станциясы бас дәрігерінің міндетін атқарушы:

- Техника паркіміз 90 процентке жаңарды. Заманауи медициналық құралдармен жабдықталған 10 реанимобиль алдық. Осының бәрі жедел медициналық қызмет сапасына оң әсер етері сөзсіз. 

Облыстың аудан, қалаларында осыған дейін барлығы 103 жедел-жәрдем көлігі болса, қазір 150-ге жетті. Осыған байланысты медициналық бригадалар санын да арттыру көзделіп отыр. 

Авторлары: Мағауия Қалиев, Ермек Мұхамедияров