Қостанайда алғаш рет полицейлер кезекшілікке дронмен шықты

Қостанайда алғаш рет жол қозғалысын бақылау үшін ұшқышсыз ұшу аппараттары іске қосылды, – деп хабарлайды Aikyn.kz сайты.

Полицейлердің айтуынша, жаңа технологиялар жаяу жүргіншілерге қатысты жол-көлік оқиғаларының алдын алып, адам өмірін сақтауға көмектеседі.

Статистика көрсеткендей, жаяу жүргіншіні қағып кету – жол-көлік оқиғаларының ең жиі кездесетін себептерінің бірі. Биыл өңірде осындай 375 оқиға тіркелді. Соның салдарынан 10 адам қаза тауып, 388 адам әртүрлі дене жарақатын алған.

Әр санның артынла адамның тағдыр тұр. Сондықтан негізгі назар профилактика мен жолдағы өзара құрмет мәдениетін қалыптастыруға аударылып отыр.

Дрондар – қауіпсіздік үшін

Бұған дейін ұшқышсыз ұшу аппараттары қала сыртындағы трассаларда қарсы бағытқа шыққан жүргізушілерді анықтау үшін қолданылса, енді оларды қала ішінде де байқауға болады.

Мәселен, дрондар қауіпті маневрлерді уақытында байқап, қайғылы жағдайлардың алдын алу мақсатында жаяу жүргіншілердің қауіпсіздігі үшін кезекшілік етеді. 

Ұшқышсыз ұшу аппараттары жүргізушілердің «зебрада» жаяу жүргіншіні өткізбеу немесе өткел маңында қауіпті маневр жасау фактілерін тіркеуге мүмкіндік береді.

Маңыздысы — дрондар жылдамдықты өлшеуге немесе «заң бұзушыларды аңдуға» арналмаған. Ықтимал қауіпті жағдайды дер кезінде тоқтату үшін олар тек бақылау және дәлелдемелік құрал ретінде қолданылады.

«Біздің мақсатымыз – жазалау емес. Ең бастысы, әрбір жүргізуші рөлге отырған кезде тек өз өмірі емес, өзгенің де өмірі үшін жауапты екенін түсінсе дейміз. Дрон – бұл біздің қосымша көзіміз, ол тәуекелді дер кезінде көруге көмектеседі», — дейді патрульдік полиция батальонының аға инспекторы Ерлік Сурағанов.

Алғашқы рейд: технология іс жүзінде

Пилоттық рейд республикалық «Жол қозғалысы қауіпсіздігі апталығы» акциясы аясында Тәуелсіздік пен Қасымқанов көшелерінің қиылысында өтті. Бұл қаладағы ең жүктемесі жоғары жаяу жүргіншілер өткелдерінің бірі.

Бар болғаны 30 минут ішінде дрон бірнеше жүргізушінің жаяу жүргіншілерге жол бермегенін тіркеді.

Мәселен, маршруттық автобус пен Mercedes Gelandewagen көлігінің жүргізушісі өткелден өтіп бара жатқан адамдарды жолдан өткізбеген Бұл бұзушылықтар бірден патрульдік экипаждарға жеткізілді.

«Ең бастысы — жүргізушілердің жаяу жүргіншілерге деген жауапкершілік сезімін қалыптастыру және жолдағы сақтық адам өмірін сақтайтынын еске салу», — дейді рейд ұйымдастырушылары.

Қостанайда дрондарды қолдану басталғалы бері осындай төрт жағдайдың алдын алынды — олардың әрқайсысы қайғылы оқиғамен аяқталуы мүмкін еді.

Технологиялар – қауіпсіздік қызметінде

Қостанай облысы Полиция департаментінде бүгінде 10 дрон бар. Оларды Ш. Қабылбаев атындағы ІІМ академиясында арнайы оқудан өткен, тиісті сертификаты бар инспекторлар басқарады.

Дрондарды пайдалану – жол-көлік оқиғаларының алдын алу саласындағы жаңа қадам, әсіресе қаладағы тығыз қозғалыс жағдайында дәстүрлі тәсілдер әрдайым тиімді бола бермейтін кезде.

Қауіпсіздік өзара құрметтен басталады.

Жаяу жүргінші – мұқият, жүргізуші – жауапты болуы тиіс. Жаңа технологиялар – бар болғаны көмекші құрал. Олар бәрімізге қарапайым ережені еске салады:

Адам өмірі – кез келген асығыстықтан қымбат.