Қостанайда автобөлшектер шығаратын зауыт бой көтереді

Былтыр Қостанай облысының әлеуметтік-экономикалық даму деңгейі 8,3 пайызға өсті. Бұл Мемлекет басшысының тапсырған межесінен 2,3 пайызға артық. 

Өңірдің биылғы көрсеткіші де жаман емес. Экономиканың барлық саласында оң серпін байқалады. Бүгін аймақ әкімі Құмар Ақсақалов биылғы жеткен жетістіктер мен облыстың өркендеуі жолындағы алдағы жоспарды бөлісті. Енді машина жасау, көлік-логистика, металлургия және ауыл шаруашылығы өнімдерін қайта өңдеу секілді төрт стратегиялық бағытқа ден қойылады. 

Қостанай облысы көлік жасау бойынша елде көш бастап тұр. Жуырда аймақта KIA зауыты іске қосылды. Жылдық қуаты 70 мың автокөлікке жететін нысанда 1500 жаңа жұмыс орны қарастырылған. Бұдан бөлек, қазір өңірде автобөлшектер шығаратын зауыттың құрылысы жүріп жатыр.

Құмар Ақсақалов, Қостанай облысының әкімі:

- Қостанай облысы – Республикамыздың машина жасау орталығы. Машина жасауда көшбасшылық позицияны ұстап тұруға бізге ағымдағы жылы ашылған жаңа KIA зауыты мүмкіндік береді. Сондай-ақ жеңіл автомобильдерге автокомпоненттер шығаратын зауыт салынып жатыр. Мұнда 800 жұмыс орны ашылады. Инвестиция көлемі – 17,8 млрд.теңге. 

Облыста сыйымдылығы 400 мың контейнерді құрайтын «Тобыл» халықаралық көлік-логистикалық кешенінің құрылысы қарқынды жүруде. Іске қосылса, жүк тасымалы 20 пайызға артады. Бұдан бөлек, аймақ экономикасы драйверлерінің бірі – қара металлургия. Өңір басшысы бұл бағытқа да тоқталды.

Құмар Ақсақалов, Қостанай облысының әкімі: 

- Рудный қаласында металлургия өнеркәсібіндегі ең көп капиталды қажет ететін жобаны – ыстық брикеттелген темір шығаратын зауытты іске асыру басталды. Осы жоба бойынша инвестициялар сомасы тек бірінші кезеңде 655 млрд теңгені құрайды, бір мыңнан астам жұмыс орны ашылады. 

Агро өнеркәсіптік кешенді дамытуда бірқатар шара атқарылып жатыр. Бүгінде астықты терең өңдеу бағыты мен заманауи сүт-тауар фермаларының құрылысы жолға қойылды.

Авторы: Альмира Оразбай