Түркістанда пластик ыдыс шығаратын зауыт ашылды

Жаңа жыл қарсаңында Түркістан қаласында пластик ыдыстар мен полиэтилен пакетін өндіретін кәсіпорын ашылды.

Сондай-ақ жылына 10 млн метр джинсы матасын өндіретін зауыттың капсуласы салынды. Бұл кәсіпорындар өңірдің өндірістік әлеуетін арттырып, бизнестің дамуына серпін береді, - дейді жауаптылар. 

Орамдағы полиэтилен пакеттері мен пластик ыдыстар шығаратын зауыт Түркістан қаласындағы арнайы экономикалық аймағында іске қосылды. Жобаны жеке инвестор жүзеге асырып, 4 млрд теңге инвестиция салды. 60-дан аса  жұмыс орны ашылды.

Гүлімай Әбішова, жұмысшы:

- Жұмыс жақсы, таза. Шамалы шулы демесең, оған да үйреніп кетесің. Ауысымды көбейтпекшіміз. Әзірге өздері басып істеп жатыр. Біз дұрыс істемей жатса, тоқтатып қалуды үйреніп алдық. Өзіме ұнады.

Болат Қалмұрзаев, зауыт директоры:

- Бізде бір рет қолданатын пакет, ыдыс-аяқ, тасқа да заттар шығады. Алдағы уақытта майлық (салфетка), бір қолданатын ыдыстар, тағы басқа нәрселерді шығаруды жоспарлап отырмыз.

Джинсы матасы өндіріледі

Сондай-ақ джинсы матасын өндіретін зауыттың іргетасы қаланды. Мұнда жылына 30 мың тонна мақта-мата жібі мен 10 млн метр джинсы матасы өндіріледі. Мыңнан аса жұмыс орны ашылмақ. Жиында облыс әкімі Нұралхан Көшеров өңірдегі мақта 100 пайыз өзімізде өңделіп, дайын өнімдер шығарылатынын жеткізді.

Нұралхан Көшеров, облыс әкімі:

- Біздің экономиканы әрі қарай өсіріп, дамытатын шикізат, мұнай емес, осындай өзімізде шығатын өнімді терең өңдеп, өз өңіріміздің әл-ауқатын көтеруіміз керек. Алдағы уақытта класстерлік дамытуды қолға алып, мақташыларымыздың экспорттық тәуелділігін толық жоятын боламыз.

Нысанның жалпы аумағы 20 гектарды қамтиды. Жобаны үш кезең бойынша жүзеге асырылады. Құны 23 млрд теңге. Дайын өнімдер Еуропа мен Орталық Азия елдеріне экспортқа шығарылады.

Авторлары: Жандос Жұмабек, Ерболат Әбіш