Қостанайда автомобиль зауыты ашылды

Қостанайда KIA Qazaqstan автомобиль зауыты іске қосылды. Президент өндіріс орнын телекөпір арқылы ресми ашты. Іс-шарада Қасым-Жомарт Тоқаев барлық тарапты құттықтап, бұл еліміздегі машина жасау саласын дамыту бағытындағы өте маңызды қадам екенін жеткізді. 

Осыдан екі жыл бұрын өңірде KIA Sportage автокөлігінің өндірісі іске қосылған еді. Енді бүгін Kia Motors корпорациясымен жасалған келісімге сәйкес зауыт ашылды. Айта кетейік, оны салу туралы шешім 2023 жылы қабылданған еді. Кәсіпорын жылына 70 мың көлік шығарады. Инвестиция көлемі – 130 млрд теңгеден асады. Оған қоса 1500 жұмыс орны ашылған. Ал оның өнімі өңірдегі барлық елдің нарығына жөнелтіледі. Алдағы уақытта компания корпоративтік оқу орталығын ашуды жоспарлап отыр. 

Қасым-Жомарт Тоқаев, Қазақстан Республикасының Президенті:

- Зауытта өндіріс локализациясына екпін қойылып отыр. Бұл шығарылатын өнімдегі қазақстандық үлесті едәуір арттыруға мүмкіндік береді. Сарапшылардың есебінше, автозауыттағы әрбір жұмыс орны логистика, сервис, инфрақұрылым салаларында жанама түрде бес-алты адамды жұмыспен қамтуға ықпал етеді. Бұл – жай ғана өндіріс желісінің кеңеюі емес, толық өнеркәсіп кластерін қалыптастыру үшін жасалған зор қадам. Мұндай жүйеде шағын және орта бизнес тұрақты дамуға мүмкіндік алады. Өндірісті ұйымдастырудың осындай кешенді тәсілі Қостанай облысының ғана емес, тұтас еліміздің индустриялық әлеуетін күшейтеді. 

Былтыр елімізде 145 мыңнан астам көлік шығарылды. Он мыңнан астам азаматым осы салада еңбек етеді. Оның жартысына жуығы – жастар. Ал Қостанайдағы зауытта бір жарым мың адам жұмыс істейтін болады. Қасым-Жомарт Тоқаев кәсіпорын алдағы уақытта инженерлердің нағыз шеберханасы болатынына сенім білдірді. Жиын барысында Алғашқы Киа Сорента көлікі шығарылды. 

Қасым-Жомарт Тоқаев, Қазақстан Республикасының Президенті:

- Былтыр осы салаға 290 миллиард теңгеден астам инвестиция тартылды. Бұл – алдыңғы жылмен салыстырғанда екі жарым есе көп. Осы үрдіс биыл да жалғасуда. Жыл басынан бері осы салаға 178 млрд теңге қаражат салынды. Инвесторлар Қазақстанға зор қызығушылық танытып отыр.