Қ.Тоқаев пен Д.Трамптың кездесуі барысында құны 17 млрд долларлық келісімдер жасалды

17 миллиард долларлық келісімдер және кеңейтілген стратегиялық серіктестік.

Мемлекет басшысының АҚШ-қа жасаған сапары барысында екі ел арасында осындай коммерциялық келісімдерге қол қойылды. Бұл жайында Қасым-Жомарт Тоқаев пен Дональд Трамптың екі жақты кездесуі барысында мәлім болды. Ақ үйде Мемлекет басшысы Дональд Трамптың президенттік қызметінің тарихи маңызына тоқталып, оның басшылығымен Америка Құрама Штаттары әлемнің жетекші экономикалық, саяси және технологиялық державасы ретінде өз орнын нығайтып келе жатқанын атап өтті. Қасым-Жомарт Тоқаевтың айтуынша, АҚШ көшбасшысы жаһандық қауіпсіздік пен тұрақтылықты қамтамасыз етуде маңызды роль атқарады. Қазақстан тарапы АҚШ Президентінің бейбітшілікке бағытталған бастамаларын толық қолдайды. Әсіресе Орта дәлізді дамытуға ықпал ететін «Трамптың халықаралық бейбітшілік және өркендеу жолы» бағдарламасына ерекше назар аударылды. Өз кезегінде Дональд Трамп Америка Құрама Штаттарының Қазақстанмен кеңейтілген стратегиялық серіктестікті дамытуға мүдделі екенін растады. Сондай-ақ Президенттер екі жақты ынтымақтастықтың өзекті бағыттарын талқылап, болашақ серіктестіктің жаңа мүмкіндіктерін айқындады. Сонымен қатар халықаралық күн тәртібіндегі маңызды мәселелер жөнінде пікір алмасты.